Press "Enter" to skip to content

Plie u MLA Mawlai ïa ka jingkieng ïaid kjat ba jrong tam hapoh ka shnong Umphrew

Shillong, Nailur : Ha kane ka sngi Saitjaiñ bala lah u MLA/MDC ka Mawlai Constituency u Bah PT Sawkmie ula leit ban plie ïa ka jingkieng ïaid kjat (jingkieng doi doi) kaba jrong tam ha ka thaiñ Mawlai hapoh ka shnong Umphrew hadien ba la dep ban maramot pat ïa ka lyngba ka skhim kaba ula pynïoh kyrpang na ka bynta ka jingmyntoi jong ki paidbah.
Kane ka jingkieng kadei kaba pynïasoh ïa ka shnong Umphrew bad ka Rangmen, bad kalong ruh ka lynti kaba kongsan tam na ka bynta ka ïoh ka kot jong ki paidbah nongshong shnong jong kane ka thaiñ kata la kalong ha ki kam khaïi pateng, ka leit ïew leit hat kumjuh na ka bynta ki khynnah skul bad kiwei kiwei pat ki jingmyntoi.
Haba aijingkren kum u Kongsan ha katei ka sngi u Bah Sawkmie nyngkong eh ula ai ka jingïaroh ïa kane ka shnong kaba la nangroi bad kiew shaphrang katba nang mih ki sngi ki snem lyngba ka jingïatreilang hapdeng ki nongïalam shnong bad ki paidbah nongshong shnong hi baroh kawei.
Ula ong ruh ba lyngba kane ka jingkieng kaba la dep ban maramot skhem bha mynta ki nongshong shnong jong kane ka shnong Umphrew kin ïoh jingmyntoi ha kiba bun ki liang.Kum u nongmihkhmat paidbah u MLA ula ong ba ka kamram ka jong u nyngkong eh kalong ban khmih na ka bynta ki jingdonkam jong u duk u suk nalor kiwei kiwei pat ki kam pynroi ha kiba bun ki liang.
Katkum ka jingïaid jong ka por u Bah Sawkmie ula ong ruh ba un khmih ba lehse ha ki snem kiban dang wan yn lah syndon ban shna noh da ka jingkieng kaba lah ban ïaid kali ha ka jaka jong katei ka jingkieng ïaid kjat khnang ba kan nang pynsuk shuh shuh ïa ki nongshong shnong jong kane ka thaiñ hi baroh kawei.
Kumba kalong mynta ula ong ba kiba bun ki longïing baduk kin sa ïoh shibun ki jingmyntoi khamtam hadien bala ïoh ïala ka jong ka C&RD block hapoh ka shnong Mawtawar ka ban pynsuk shibun ha kaba ïadei bad ka jingpyntreikam ïa ki skhim bapher bapher.
Shuh shuh ula ong ruh ba mynta na ka liang ka jong u, u dang pynkhreh ha kaba ïadei ban pynïoh ïa ka lynti surok na Umphrew sha Nongkohlew ïa kaban yn mang ha ka jinglut kaba da ki klur tyngka.Ula ong ruh ba ki paidbah ka thain kin sa ïoh kam ruh lyngba kane ka project.
Ha kaba ïadei bad ka shnong Umphrew u Bah Sawkmie ula ong ba un sa pynioh noh da ka kali kit nongpang (Ambulance) khnang ban pynsuk shibun haba jia ka pang ka shitom khamtam ha ka miet ka ïong namar kadei ka jaka kaba la kham pajih.
Ha katei ka jingïalang bala pynïaid da u Bah Secretary Shnong barim kum u Chairman la ïoh ruh ka jingkren na u Bah Marbud Dkhar uba long ruh u President ka FKJGP Mawlai Circle, bah S.Biam President MBCC, Rangbah Shnong bah E.Langstieh, Secretary Shnong bad kiwei kiwei.