Press "Enter" to skip to content

Ranikor by-election : Jop u NOTA ha ki 8 PS, ïa khaid bun jaka bad Congress-PDF

Shillong, Nailur 02 : Ka elekshon shiteng samoi na Ranikor ka la sakhi ba u budam Non Of The Above (NOTA) u la jop haduh phra tylli ki polling station bad ïakhaid pat haduh khyndai jaka bad ki kyrtong jong ka Congres bad People’s Democratic Front (PDF).
Ha katei ka elekshon shiteng samoi kaba la pynbna ha ka 27 tarik mynta u bnai, na ki 65 tylli ki polling station, u NOTA u la ïoh ban ïakhun bad ki arngut ki kyrtong ha ki 17 tylli ki polling station, kata pyrshah ïa u kyrtong ka Congress, u Jackius Sangma bad ruh ïa u kyrtong ka PDF, u Bah PN Syiem.
Ha ki shnong Khasi, ki jaka ba u NOTA u jop ki dei ha Ngunraw A ha kaba u kyrtong jong ka party Congress u Jackius A Sangma u ïoh tang shi vote, u NOTA u ïoh 2 vote katba u kyrtong PDF u ïoh 29 vote. Kumjuh ha Ngunraw B u NOTA u ïoh 4 vote katba u Jackius u ïoh tang shi vote.
Sa kawei ka polling station kaba u NOTA u jop kiba dei na ka shong ba shong ba ki Khasi dei na ka Mawpud polling station ha kaba u Jackius u la ïoh tang 5 vote katba u NOTA u ïoh 8 vote.
Ha ki polling station ba don ha khappud pat, u NOTA u la jop ha Nonghyllam namar u ïoh haduh 6 vote, katba u kyrtong Congress u ïoh tang 2 vote bud sa u kyrtong PDF da 4 vote. Ha Kaitkona u Jackius u ïoh tang shi vote bad u Bah PN Syiem u ïoh 0 katba u NOTA u ïoh 2 vote.
Ha Bagli polling station u Jackius u ïoh 17 vote u Bah PN Syiem u ïoh 4 vote katba u NOTA u ïoh 6 vote bad ha Majisora u Jackius u ïoh shi vote u Bah PN Syiem u ïoh shi vote katba u NOTA u ïoh 6 vote. Na Mawlongbah ruh u jop u NOTA ïa u Jackius.
Ki polling station kiba u NOTA u ïoh mar katjuh ki vote bad ki kyrtong kadei ha Rangasora polling station ha kaba u Bah PN Syiem u ïoh 5 vote bad u NOTA pat u ïoh 5 vote. Ha Munai polling station u Bah PN Syiem u ïoh 7 vote bad u NOTA ruh u ïoh 7 vote.
Ha polling station Bolabeta u Bah PN Syiem u ïoh 5 vote kumjuh ruh u NOTA u ïoh 5 vote.Ha Myriaw u kyrtong Congress u ïoh 0 kumjuh u NOTA ruh u ïoh 0 vote. Ha Khonjowai u Bah PN Syiem u ïoh 2 vote bad u NOTA ruh u ïoh 2 vote. Ha Amarsang polling station kumjuh ha Sohhylleng, baroh lai, kata u kyrtong Congress, PDF bad NOTA ki khlem ïoh vote satia.
Haba kheiñ lang baroh ïa ki vote ba u NOTA u ïoh ki long haduh 184 na ki 65 tylli ki polling station hapoh jong ka Ranikor Constituency.