Press "Enter" to skip to content

UCIL, Khylliap noh junom ïa ka jingthmu tih Uranium ha ka Bri u Hynñiewtrep

Shillong, Nailur 02 : Hadien ba ka Uranium Corporation of India Limited (UCIL) ka la rai ban khang noh ïa ki ophis treikam jong ka ha sor Shillong bad ha Wahkaji na ka liang ka Khasi Students’ Union (KSU) ka dawa ruh na kane ka tnad treikam jong ka sorkar pdeng ba dei peit ïa ki kam tih marpoh khyndew ba ka dei ban khylliap noh shi junom ïa ka jingthmu ban tih ïa u marpoh khyndew Uranium na ka Bri U Hynñiewtrep, lym kumta ka seng ka long kaba la pynkhreh ban ïakhun pyrshah.
Ka kyrwoh na u President ka Seng, Bah Lambokstarwell Marngar, ka ong ruh ba ka KSU ka dawa ruh na ka sorkar pdeng ha Delhi ba ka dei ban pynmih noh mardor ïa ka hukum ban sangeh bad ban khang ïa ka jingtih ïa kino kino ki marpoh khyndew kiba buh jingma (radioactive) kum u Uranium napoh ka Bri U Hynniewtrep.
“Lada ka sorkar pdeng ka thmu beit bad ap beit kliaw kumno ban ïoh khlong ïa u Uranium na Ri Khasi ka mut kam dei shu ka sorkar pdeng hynrei ka la dei ka sorkar kmienah kaba leh donbor ïa ki Jaidbynriew rit paid bad ka bym don jingkitkhlieh na ka bynta ka ki riewlum kiba ka la pynkylla nong India,” ong ka kyrwoh.
Shuh shuh u la ong ba ki don bun tylli ki ri ki la khang khyrdep lut ïa ki par tih Uranium ha la ki jong ki shnong namar ka jingwanrah ïa ki jait jingpang kiba har rukom kiba lah ban hiar pateng haduh ki spah pateng ruh. “Ym lah ban len ruh ba ki ri kiba pawkhmat ki tih beit ïa une u marpoh khyndew ba long Ïakjakor tang na ki bynta ba shong shnong da ki jaidbynriew rit paid. Ha ri India ruh ïa u Uranium la khlong beit na ki jaka jong ki Adivasis, ki kynhun jaidbynriew kiba rit paid bad kiba dang sahdien haduh katta katta kum ha Jharkhand bad Andhra Pradesh,” bynrap shuh shuh ka kyrwoh . Ka kyrwoh na ka seng ka ong ruh ba lyngba ki lad pathai khubor bad kumjuh na ki social medïa ki la ïohi bad sakhi haduh katno ka jingshyrkhei ka wan ha kito ki jaidbynriew ki ba shong shnong hajan ki par Uranium. “Ym tang kata, hynrei ka jingtih ïa u Uranium ka wanruh ïa ka jingkylla phet wir ki trai shnong na ki jaka jong ki kiba long nongkynti naduh ki por hyndai hynthai. Halor kitei ki nongrim la pynlong ïa ka KSU ba kan pyrshah doh-ïap doh-im ïa ka jingthmu ban tih ïa u Uranium na Ri Khasi naduh ki por 1993 haduh kane ka khyllipmat kaba mynta.”
Ka KSU ka ong ruh ba ha katei ka jingïakhun, ki dkhot ka seng ki la mad shibun ki jingkthang bad jingshah shitom kum ha ki snem 2009 bad kumta ter ter namar ki la shah kthong ha ki bor synshar ka jylla, ki la shah set byndi bad don kiba haduh mynta kiba la khrew lut ka met ka phad. “Ha ki por kiba mynshwa ka KSU kham bunsien ka ieng marwei ban pyrshah ïa ka jingthmu ban tih ïa u Uranium haba ka la don ka jingkynthoh na ki paradoh parasnam ruh ba balei ka KSU ka pyrshah ïa ka roi ka par. Ki don na kitei ki parari kiba la ïoh jingmyntoi na ka UCIL bad ki don ruh ki bym tip ïa ki jingma ki ban wan lada tih ïa une u marpoh khyndew. Kine ki bym tip eiei ki la kynnoh ruh ba ka KSU ka shah ïalam bakla halor ki jingma lada tip Uranium. Hynrei ha kane ka juk kaba mynta pat lyngba ka technology ki paidbah ki lah ban ïohi kiei kiba jia ha ki jaka ba tih Uranium lada dei ha India ne wat ha ki ri kiba kiew ka roi ka par,” bynrap ka kyrwoh.
Ka seng ka ong ruh ba ki la pynkhreh lypa ban ïaleh pyrshah ïa kano kano ka jingthmu ban tih ïa u Uranium la ka wan ha kano kano ka por ruh. “Ki dkhot ka seng ki kloi ban aiti ïa la ka jingim ruh ban ïaleh pyrshah ïa ki tup ki man jong ki nongshun kiba thmu ban khlong ïa utei u marpoh khyndew. Ka KSU ka ong ba na ka bynta ka jingmyntoi kiwei pat ki nong Indïa ki Khasi kin hap ban shem lanot ne wat haduh ban duh jait ka long ka bym lah ban pdiang da leilei ruh em,” pynkut ka kyrwoh na u President.