Press "Enter" to skip to content

Khlem treikam ka rai weng building bylaws, dang shah pyndik ki nongshna ïing: EM

Yn leit pynkynmaw biang ka KHADC ïa u CM

Shillong, Nailur 06 : Ka Khasi Hills Autonomous District Council (KHADC) ha ka sngi Palei ka la shim ïa ka rai ban hap leit kynduh biang ïa u Myntri Rangbah ka Jylla, u Conrad K Sangma kumjuh ïa u Myntri ka tnad Urban Affairs, Bah Hamlet Dohling halor ka jingbteng shah pyndik ki paidbah ba shna ïing thymmai hapoh u pud u sam jong ka Council.
Haba kren bad ki lad pathai khubor, u Executive Member ka tnad Town Committe jong ka KHADC, Bah Latiplang Kharkongor u la ong ba katkum ka jingujor ba ki ïohsngew na ki paidbah kiba shna ïing thymmai, ki tnad sorkar ki pan beit ïa ka Occupancy Certificate na ka ophis MUDA lym kumta kim ïoh satia ban ring um lane ka bording.
“Kumta, na ka liang ka Council, ngi hap ban leh ei ei halor kane ryngkat u Chief Executive Member, ki Executive Member bad ki MDC ban ïa kren biang bad u Myntri Rangbah kumjuh u Myntri ka tnad Urban Affairs halor katei ka bynta ha ka taiew ban wan,” ong u Bah Latiplang.
La ïathuh ruh ba katkum ka jingïalang kaba long ha ka 15tarik u Jymmang, 2018 ha Secretariat hapdeng ka u Myntri Rangbah, ki Myntri sorkar, na ka KHADC bad ruh ka Synjuk ki Nongsynshar Shnong ka Bri u Hynñiewtrep (sor), ka la mih ka rai ba ka sorkar jylla kan weng noh ïa ka Meghalaya building byelaws napoh u pud u sam jong ka KHADC.
La ong ruh ba ha katei ka sngi, ka sorkar ka la bthah ruh ïa ka tnad Meghalaya Energy Corporation Limited (MeECL) bad ka Tnad Public Health Engineering (PHE) ba kin sangeh noh ïa ka jingpan ïa ka jingai jingbit ka MUDA haba donkam ring bording bad ring um sha ki Ïing ba dang shna thymmai hapoh ki jaka ba hap ha ka Sixth Scheduled.
U la ong ruh ba mynta la saw bnai ka por ka la ïaid naduh katei ka sngi ba long jingïalang ha kaba shim ïa ka rai ban ym donkam ban shim ïa ka Occupancy Certificate na ka MUDA na ka bynta ki nongshong shnong ba sah ha u pud u sam jong ka Council, hynrei ki paidbah pat haduh mynta ki dang ïai mad ïa ki jingeh.
“Ki paidbah mynta ki la kulmar jingmut namar nyngkong la rai ban ym donkam shuh ïa ka occupancy certificate na MUDA na ka bynta ban shna ïing thymmai khnang ba kin ïoh tan um bad tan bording, pynban kane ka la buh jingeh ïa ki paidbah,” u la ong. Ha kajuh ka por u la ong ruh ba ka PHE bad MeECL pat haduh mynta ka dang bthah ïa ki paidbah kiba sah ha u pud jong ka Council ba ki dei ban ïoh beit ïa ka Occupancy Certificate na ka MUDA.
“Ngin hap ban ïa kren ïa kane ka kam bad u CEM bad ruh ïa ka jingdonkam ban leit kynduh ïa u Myntri Rangbah kumjuh ïa u Myntri ka tnad Urban Affairs ryngkat ka jingdon lang ki Executive Member bad dkhot ka Council khnang ban ïoh ïa kren biang ïa kane ka kam,” bynrap biang u EM.
U Bah Latiplang u la ïathuh ruh ba na ka liang ka Council hi ka la ïaid shakhmat ban pynbit pynbiang ïa ka KHADC Building Bylaws bad mynta ka la don ha ka bynta ban pynjanai ïa ka. Shuh shuh u la ong ruh ba ka Council ka ap mynta sa tang ka rai na ka sorkar jylla ban weng noh ïa u pud u sam treikam jong ka MUDA na ki jaka jong ka Council haba ïadei bad ka jingpyntreikam ïa ki kyndon shna ïing thymmai.
Utei u EM u ong ruh ba kum ka Council ki hap ban shimkhia bha ïa katei ka kam namar kadei ka bynta kaba ktah bha ïa ki nongshong shnong khamtam kito kiba thmu ban shna ïing thymmai.