Press "Enter" to skip to content

Ïa ka Dorbar Hima yn ym pynlong shuh ha Shillong ha ki snem ban wan

Ba duna palat ki khun hajar ba poi
Shillong, Nailur 07 : Ka jingduna palat ki khun ki hajar ba poi sha ka Dorbar Hima jong ka Hima Mylliem kaba long ha kane ka sngi Thohdieng ka la pynlong ïa u Chief Executive Member ka KHADC, Bah HS Shylla ban kyntu ïa ka Hima Mylliem ba naduh u snem ban wan kam dei shuh ban pynlong ïa ka ha nongbah Shillong.
Lada kheiñ lut baroh, ki la don haduh kumba 400 tam tylli ki shnong ba hap ha ka Hima Mylliem kaba mut 400 ngut tam tang ki Rangbah Shnong, hynrei ha katei ka sngi pat ki paidbah ba poi ki duna haduh katta katta namar bun ki shuki ba la pynkhreh bun ki shong thylli.
“Naduh u snem ban wan ym dei shuh ban pynlong ha Shillong hynrei dei ban pynlong ha ki jaka ba ieid ïa ka Jaidbynriew,” ong u CEM haba kren kum u Kongsan ha katei ka Dorbar Hima kaba long ha Polo. Nalorkata, u la ong ruh ba u la nang tharai ba ka jingïalang ha katei ka sngi ka la dap bad khangiah da ki khun hajar phewse long pynban mar khongpong. Katkum ka jingong jong u, ki la don haduh kumba 15 ngut ki MLA kiba shong ba sah ha u pud u sam jong ka Hima Mylliem hynrei ki khlem poi satia. Nalorkata, u ong ruh ba lada poi lut tang ki Rangbah Shnong ruh ki shuki ha katei ka sngi ki la dap. “Da wan tang ki Rangbah Shnong ruh ki shuki ki la dap.”
Nalorkata, u ong ruh ba um da sngew phylla than halor ka jingpoi duna ki briew sha katei ka jingïalang namar kadei hadien 18 snem, kata naduh u Nohprah 2000 ba la lah ban pynlong biang ïa katei ka Dorbar Hima.
“Kane kadei ka jingpynkhie im biang ïa kaba la ïap. Jingshisha kane ka madan ka la dei ban shlei hynrei kyrmen ba kane ka Dorbar kaba rit kan sa heh biang.
U CEM u la kyntu jur ruh ïa baroh ki Hima ba ki dei ban shim ka jing kitkhlieh ban pynlong beit ïa ka Dorbar Hima shisien ha ka shisnem. U la ong ruh ba kino kino ki bym lah ban pynlong ïa ka Dorbar Hima man u snem ki lah ban shah weng noh ïa ka jinglong Syiem ne Acting Syiem. U Bah Shylla u la ong ruh ba ki dawa na ka sorkar Assam ba kan aiti biang ïa ka Block I bad Block II sha Meghalaya namar kitei ki jaka ha kito ki por ki hap ha ka United Khasi and Jaintia Hills District.
“Ngi dawa ïa ka sorkar Assam ba kan pynphai biang ïa kitei ki jaka shangi,” u la ong da kaba bynrap ba kumba ki shim ïa kitei ki jaka da ka lynti jong ka aiñ kumta ruh kidei ban pynphai biang. Ha kajuh ka por u kyntu ruh ïa ka sorkar jylla ba kan shim ïa kane ka ishu ryngkat ka jingkyntu ïa ka sorkar pdeng ba kan tuklar lang.
Shwa kane, na ka liang u Acting Syiem ka Hima Mylliem, Paiem Ainam Syiem u la ong ba kawei na ki rai jong katei ka Dorbar Hima ka long ban pynlong beit man u snem ïa katei ka Dorbar Hima. Ym tang katta, u la pynpaw ruh ba ha ki snem ban wan ïa katei ka Dorbar Hima yn pynlong ha kylleng ki jaka ba hap ha u pud u sam jong ka Hima Myliem.
Haba ïadei pat bad ka jingkajia pud u sam ba don hapdeng ka Hima Mylliem bad ka Assam, ka Dorbar Hima ka la rai ruh ban treilang hapdeng ki district council, bor distrik bad sorkar jyla khnang ban ïoh noh ïa u pud u sam uba shai hapdeng ka jylla Meghalaya bad Assam. Bad ka rai kaba lai pat ka long ban pynneh pynsah ïa ka synshar ka khadar kumba la don naduh mynshwa.
Lah ban kdew hangne ba kiba bun ki khun ki hajar ba poi sha katei ka Dorbar Hima kidei na Ri Bhoi District kumjuh na ki thaiñ Mylliem katba na ki shnong ba hap ha sor ki duna bha. La pynshongkun ia katei ka jingialang da ki jingshad tynrai bad ki jingrwai na ki khun ki hajar ha kaba khambun ki dei na Ri Bhoi.