Press "Enter" to skip to content

Lyngba ki 7 kol ka Darishisha, jop ka Nonglang SC ïa ka MFO ka office u DSO, Mawkyrwat

Mawkyrwat, Nailur 7: Ka Nonglang Sports Club hynne ka sngi Thohdieng jong ka taïew ka la long ka nongjop pyrshah ïa ka Mawmerang Sports Club da 7 – 0 kol kaba dei jong ki khynnah kynthei Under – 18 ha ka lympung ïalehkai football ba la tip kum ka Mission Football Open (MFO) South West Khasi Hills District Tournament 2018 ba la pynïaid da ka Office jong u District Sports Officer, Mawkyrwat hapoh madam MDSA, Mawkyrwat.
Ïa ki kol na ka bynta ka Nonglang Sports Club na ka liang ka Darishisha Kharlyngdoh ka la ïoh ban thep ha ka minit kaba 29, 35, 40, 42, 44, 51 bad 58, katba ha ka Under – 15 jong ki kynthei na ka liang ka Mawten Sports Club ka la jop pyrshah ïa ka Photjaud Sporting & Cultural Club ha ka Tie Breaker da 2 – 1 kol. Hynrei na ka liang ka Jakrem Sports Club bad ka Mawlangwir Sports Club kim shym la ïoh ban ïalehkai ha kane ka sngi namar kim shym la pynbiang ïa ka por ba la buh da ka Office jong u DSO.
Ha ka jingïakhun jong ki shynrang Under – 18 hapoh Madan MDSA na ka liang ka Mawranglang Lai Kyntoit Sports Club ka la pynliem noh ïa ka Mawthawiang Nongtraw da 5 – 0 kol. Ka Mawlangwir Sports ka la jop da 8 – 0 kol pyrshah ïa ka Moit-Hla S&A.
Na ka liang jong ki shynrang Under – 15 ba la pynlong hapoh madan Nonglang ka Rangthong Christian Hr. SS ka la pynliem noh ïa ka Young Gun Gr. Mawkyrwat da 1 – 0 kol, katba ka Nongpynden Rangmaw SC ka la jop pyrshah ïa Hynñiew Shnong SC da 2 – 0 kol. Kumjuh ka Mawshilong Sports Club ka la pynliem noh ïa ka Jakrem Sports Club da 5 – 0 kol, nangta ka Youth Welfare C&SA Jashiar ka la shah liem noh lyngba ka Tie Breaker ha ka Friends United da 3 – 2 kol.
Ka jingïakhun hapoh Ranikor Block kaba dei ka Final jong ki kynthei Under-18 ka Bolabeta Girls Sports Club ka long ka kynhun kaba jop pyrshah ïa ka Khangkhlak Sports Club da 1 – 0 kol lyngba ka Megnalish N. Marak ha ka minit kaba 65, katba na ka liang jong ki shynrang Under – 18 ka Nolikata Hr. Secondary School ka la pynliem noh pyrshah ïa ka Practice Boy da 2 – 0 kol lyngba u Nantu Sangma (35 m) bad na u Nikseng D. Shira (43 m). Ka Thangrai Grass Root Centre pat ka la jop noh da 3 – 0 kol pyrshah ïa ka Mawlongbah Sports & WORG kaba dei jong ki khynnah shynrang Under – 15 lyngba ki kol na u Donbok Turnia (30, 49 bad 58 m).