Press "Enter" to skip to content

Ai jingmut ka kynhun u Bah John ïa ka Hima Mylliem ban pynbeit ïa ki Rule

Shillong, Nailur, 08: Ka kynhun jong u Bah John Kharshiing ba la soi da ki katto katne ngut ki khun ki hajar jong ka Hima Mylliem, ha ka sngi thohdieng ki la aiti ïa ka dorkhas ha u Paiem Ainam Manik Syiem, Acting Syiem ka Hima Mylliem da ai jingmut halor ka jingdonkam kyrkieh ban pynbeit thymmai bad ban pynjanai ïa ki Act bad ki Rule Hima Mylliem i) The Khasi Autonomous District (Appointment and Succession of Syiem, Deputy Syiem, Electors, and Rangbah Shnong of Mylliem Syiemship) Act 2007 bad ïa ka ii) The Administration of Mylliem Syiemship Rules, 2015.
Kane ka kynhun ka la ai khublei kyrpang ïa u Pa’iem bad ïa ka Dorbar kaba la lum ïa ka Dorbar Hima Mylliem hadien 18 snem bad ha kajuh ka por ka la ai khublei kyrpang ruh ïa u Bah HS Shylla, Chief Executive Member ka KHADC bad ki dkhot ka Executive Committee kiba la plie lad ban ïoh ïa katei ka Dorbar Hima kum shibynta ban pynim ïa ka jaidbynriew Hynñiewtrep.
“Halor ka jingklumar kaba sngewsih kaba la mih naduh ka 31 tarik Jymmang 2018 ha Iew Them Mawlong, Shillong hapoh Hima Mylliem, ka dawbah ka long ka jingbym don ka Land Policy kaba shai hapoh ka Hima Mylliem. Ma ngi ki khun ki hajar ka Hima Mylliem ngi dawa ba dei ban don ka jingshai na ka Dorbar u Syiem Hima Mylliem, halor ka rukom ai pata sha ki bym dei ki khasi hapoh Hima Mylliem. Mano bad kumno la ai ïa kitei ki dulir khyndew da kaei ka lad ka lynti ban ïoh pyrkhing ïa ki rukom ai pata khlem tip ka Dorbar Hima baroh kawei,” ong kane ka kynhun.
“Ngi donkam ruh ban ïoh jingshai halor ka hok u khun u hajar hapoh u pud u sam ka Constitution Ri India khamtam halor ka i) “Muncipality of Shillong” ii) “Shillong Administered Areas Municipality” iii) “Cantonment” bad iv) u pud ka Sixth Schedule ban sngewthuh ki bor aiu ba la pynkhamti ïa ka “Municipal” bad “Cantonment” ha kaba ïadei bad ka imlang sahlang ka khaii pateng bad ki jingtreikam ki Act Hima Mylliem hapoh kitei ki lai tylli ki jaid jaka kiba don hapdeng Sor ka Hima Mylliem,” la pynpaw kane ka dorkhas.
Kane ka kynhun ka la pynpaw ba la donkam ban batai shuh shuh bun ki bynta jong ka synshar khadar ka bishar Hima Mylliem ha kitei ki Act ki Rule khnang ba kin long kiba kham treikam khnang ba kin long pat kiba pynim ïa u khun u hajar.kum ka nuksa la donkam ban ïoh ïa ka kaiphod kut snem man ka snem hakhmat ka Dorbar Hima, kumjuh la donkam ban ïoh ïa ka jingtip kaba shai halor ka jingmih (revenue) ka jingdon (assets) ka jingkhien jingdiah ( reciept and expenditure) kaba bniah (audited accounts) bad ban tip ïa ka mang tyngka (budget) jong ka Hima Mylliem.
“La donkam ruh kyrkieh ban ïoh jingshai na ka Dorbar Hima Mylliem halor ki kyndon thaw iing, thaw iew, thaw shnong,” ong ka dorkhas bad bynrap, “la donkam ruh ban don ki kyndon kiba kham shai kumno ban lum Dorbar Kur, Dorbar Shnong, Dorbar Raid bad Dorbar Hima haba ki nongsynshar kim lum ïa kitei ki Dorbar ki bapher bapher. Shuh shuh la donkam ha kitei ki Act ki Rule ban don ki kyndon kiba bniah kumno ban pynïaid Dorbar bad ba ki khun ki hajar kin ïoh ïa ki jingïatai ki jingïakren ha kaba ki khun ki hajar kin phah lupa ki Resolution, ki jingkylli, ki phang jingïakren 40 sngi shuwa ban long Dorbar lehse lyngba ki Dorbar Kur, Dorbar Shnong ne Dorbar Raid hapoh ki Dorbar kum ba ki long hapoh ki Assembly, District Council ne Parliament Ka long kaba donkam ban buh shai ïa kitei ki kyndon khnang ba kan pynsuk ïa ki nongsynshar Hima Mylliem ba kin ïoh pynkhreh ïa ka Dorbar Hima kaba hun.”
Shuh shuh ki kam kiba kyrkieh ki long ba katkum ka The Administration of Mylliem Syiemship Rule 2015 baroh ki Dorbar Shnong, ki dei buh ïa ki Fund ki Account ha ki rukom kiba biang kaba mut dei ban plie ïa ka Bank Account ha ka kyrteng jong Dorbar Shnong hynrei kumba ka long naduh ki Dorbar Kur, ki Dorbar Shnong, Dorbar Raid bad Dorbar Hima kim don lad ban plie ïa ka Account hapoh Bank namar ka jingdkoh ka jingithuh da ka Constitution Ri India, bad ka jing tyngkhuh ha kaba ïadei bad ki PAN Card, bad ka Ain Income Tax Act 1961.
Wat hapdeng ki jingduna kiba bun, kane ka sngi ka long ka jingsdang jong ka lynti ban pynim biang ïa ka Hima Mylliem, ngi dap da ka jingsngewkmen bad ai khublei biang ïa u Acting Syiem Hima Mylliem bad ka Dorbar kiba la lum la khot ïa kane ka Dorbar Hima Mylliem. Shuh shuh ngi ai khublei ïa u Bah HS Shylla, CEM, KHADC, uba la kular skhem ba nangne shakhmat baroh ki Dorbar Hima ki dei ban lum ïa ka Dorbar Kut snem ha kaba shai ha ryngkat u Khun u Hajar bad ha kaba la kynthup lang ïa ki Dorbar Kur, ki Dorbar Shnong, bad Dorbar Raid bad ngi long kiba kloi ban ai ka jingïatreilang na ka bynta ka Ri bad ka jaidbynriew khasi kaba kyrpang.