Press "Enter" to skip to content

Ai jingsumar dawai ei ka KSU

Shillong, Nailur, 08:Ka Khasi Student Union ( KSU) Mawlai Circle, hynne ka sngi saitjaiñ ka la pynlong da ka jingai jingsumar ei ha ka shnong Madan Mawkhar, kaba dang hap hapoh u pud u sam jong ka Mawlai Constituency. La plie paidbah ïa kane ka jingai jingsumar ei da u Samla Sonstar Nongkhlaw, uba long u Assistant General Secretary ka KSU Central Body .
Shwa ban sdang ka jingsumar ïa ki paidbah nongshong shnong, la ai jinghikai bad
pynsngewthuh ruh halor ka jingkordor ka koit ka khiah da ka Dr. P. Lyngskor kaba peit bad khmih ïa ka Mawsiatkhnam PHC.
Ka Dr. Lyngskor haba kren ha kane ka jingïalang, ka la batai shaphang ka jingdonkam ban ai injek khamtam ïa ki khyllung bad ki longkmie kiba armet. Ka la kyntu ruh ïa ki paidbah ban ïatrei lang khang ban rat dyngkhong ïa ki jingpang kiba bun jait ki ba ktah ïa ki khyllung bad ïa ki khynnah bad ha kajuh ka por ka la kyntu ïa ki longkmie ban wan shakhmat khnang ba kin lah ban tehlakam ïa ki jingpang.
Ha kane ka sngi ka KSU ka la sam ruh da ki musari sha ki 65 ngut ki longkmie jong kane ka shnong bad da ki shatri ïa ki khynnah skul jong kane ka shnong bad da ki jersey footbal bad ar tylli ki bol sha ka Sport Club jong ka shnong.
Na ka liang ki paidbah ki la ïoh ruh ka lad ban phah sumar ïalade bad ïoh dawai khlem ka jingsiew da ka jingïarap jong ka KSU Mawlai Circle.
Ïa ki paidbah la ai jingsumar da ka Dr P Langshkor bad ka Dr B Marbaniang kaba trei ha Super Care Hospital.
La synran lang ïa ki paidbah da ki dkhot ka KSU bad ki riewrangbah jong ka shnong.