Press "Enter" to skip to content

Kyrshan ka Thma u Rangli Juki ïa ka rai jong Supreme Court halor ka Section 377

Shillong, Nailur, 08: Ka Thma u Rangli Juki (TUR) ka pynpaw ïa ka jingkyrshan ïa ka rai jongka Supreme Court ka ri India kaba la ai ïa ka rai ba khatduh halor ka Section 377 IPC da kaba kren shai ba ka Section 377 ka long pyrshah ïa ki nongrim jong ka Riti Synshar ka Ri India (Constitution).
“Kumta ka Supreme Court ha ka rai jong ka ka la pyndam bad pynïap noh ïa ki bynta jong ka Section ka 377 kiba baroh shi katta ki kheiñ beaiñ ne niew riewpynkheiñ aiñ ïa ki briew kiba la san kiba don jingïadei para kynthei ne para shynrang ne kiwei pat  kiba ngi tip kum ki Transgender,” ong u kyrwoh na ka kong Angela Rngad, Convenor ka TUR.
“Kane ka dei aiñ kaba la treikam naduh ka por ka Sorkar Phareng bad kaba la ñiew beiñ ñiewpoh bad kheiñ riew runar ïa ki para briew mynta la shispah san phew snem tam. Kumta ki Nongbishar da kawei ka sur ki kren shai ba kane ka Aiñ ne section 377 kam lah ban ieng hakhmat ka Riti Synshar ka Ri. Ki nongrim jong ka Riti Synshar ki long kham halor ban ïa kiwei pat ki nongrim, ong u Chief Justice ka Supreme Court. Kumta ngi dei ban pynduh pyndam noh ïa ka rukom peit ibeiñ da ki khmat pynrem, khmat lorni bad dei ban pynkut noh ïa ka jingleh shilliang khmat ïa ki parabriew kiba ïa ieid para kynthei para shynrang bad ïa ki Third Gender. Ki parabriew kiba kum kine ne kita ki LGBT ma ki ruh ki don kijuh ki hok bad ki long mar ryngkat hakhmat ka aiñ bad ka Riti Synshar ka Ri,” ong shuh shuh ka Kong Angela.
Ka TUR ka ieng lang ha syndah ki LGBT bad khamtam eh halor ki nongrim kiba don hapoh kane ka rai jong ka Supreme Court. Ka rai jong ka Supreme Court ka kren shai ba ym don jaka ïa ka jingpyntieng ne jingbyrngem bad jingleh shilliang khmat kaba baroh shikatta kine ki para briew ki la shah. Kane ka Rai ka dei ruh ka jingdumok ïa ki nongïalam ka saiñ hima kiba ju mlien ban kren tohmet bad pynshit ban leh tohmet bad pynshitom ïa ki LGBT. Ka Justice Indu Malhotra ka kren shai ha ka rai jong ka, ba ka histori ka dei ban panmap na kine ki para briew para jingthaw namar ka jingpynshitom beiñ ïa ki mynta la bun spah snem.
Ka TUR ka ieng halor ka nongrim ba baroh ki dei ban ïoh ïa ka hok longbriew manbriew bad kum ki nongshong shnong ki dei ban im bad ïoh ki hok kiba la saiñdur ha ka Riti Synshar ka Ri. Khamtam kine ki para briew kiba long ruh kiba rit paid tam ha ka Ri ki dei ban ïoh ki hok jong ki bad ban im pura kum ki briew bad ki dei ban long mar ryngkat hakhmat ka aiñ bad ka riti synshar bad ki dei ban ïoh kijuh ki hok ryngkat lang bad ki nongshongshnong.
Dang shen ka TUR ka la ieng na ka bynta kawei ka parabriew kaba la shah pynshitom bad shah ibeiñ tang na ka daw ba ka pynpaw ïa la ka jinglong tynrai ka longbriew manbriew jong ka.
“Kane ka sngi ka long ka sngi ka ban sah jingkynmaw ha ka histori jong ka Ri India bad da kane ka rai la plie bad ïalam ïa kane ka pateng bad ki pateng ki ban dang wan sha ka Ri India kaba thymmai, ka Ri kaba kdup bad kynthup ïa baroh lang da ka jingieid. La ïalam ruh sha ka Ri kaba sngewthuh ba ka hok bad ki nongrim jong ka Riti Synshar ki don bad ki long kiba skhem ban ai ha baroh ki nongshongshnong ïa ka jinglaitluid, ka jingshngaiñ bad ki hok ban im pura kum ki briew, kam pher ngi long kiba kumno. Kumba u Chief Justice ka Supreme Court u la ban bad ong, “Nga long kumba nga long, pdiang ïa nga kumba nga long,” la ong shuh shuh ka Kong Angela.