Press "Enter" to skip to content

Pyrshah jur ka MPMC ba pynkiew dor palat ka Sorkar BJP ïa ka Petrol

Shillong, Nailur 08: Ka Meghalaya Pradesh Mahila Congress (MPMC) hynne ka sngi saitjaiñ kala pynlong ïa ka jingïakhih ban pyrshah jur ïa ka jingpynkiew dor palat liam jong ka Sorkar National Democratic Alliance (NDA) ba lamkhmat da ka Bharatiya Janata Party (BJP) ïa ka petrol bad diesel ha ka Ri.
Ka MPMC kala ïakhih da kaba ialum paidbah ha Congress Bhavan ryngkat ka jingrah ïa ki placard bad ki jingpyrta slogan pyr shah ïa ka Sorkar NDA.
Ki Dkhot ka Mahila Congress kila rah ïa ki placard ba don ïa ki jingthoh ba ong ‘Ka sur jong u paidbah kan sa sawa jam ha baroh ki Jylla ka Ri…Lah biang…Lah biang’,’Hato ka jingpynkiew dor ïa ka petrol bad diesel ka long ba u Modi u kwah pynmyntoi ïa ki Hehspah? Ngi kwah ïa ka jubab? bad ngi pynrem jur ïa ka jingpynkiew dor nalor kiwei kiwei.
Hadien ba ïakren bad ki lad pathai khubor, ka President jong ka Mahila Congress Kong Joplin Scot Shylla kala ong ba u Myntri Rangbah Duh ka Ri u Narendra Modi ula pynkheiñ lut ïa baroh ki jingkular kiba pynlong ïa u ban ïoh wan ha ka bor ha u snem 2014.
Ka Bharatiya Janata Party ka jingïalap elekshon MP-2014, klaa kular ïa ki paidbah ka Ri ba ka Ri kan sa ïohi ïa ki sngi kiba bha (acche din) lada ka BJP ka shah jied ban wan ha ka bor synshar.
“U Narendra Modi ula lute na India, u Narendra Modi ula shukor ïa ki paidbah ka Ri India. Baroh ki jingkular ba ula khlei, la pynkheiñ lut. Ka jingbujli lut tyngka kala jia hynrei shaei kata ka jingkular ban wanrah pat ïa ka Black Money (pisa ba kamai khlem siew khajna)’ ong ka Kong Shylla.
Kane ka Nongïalam ka Mahila Congress kala kdew ruh ïa ka jingdonkti jong ka Sorkar ban die ïa ka petrol sha ki Ri kum ka England bad Australia ha ka dor ba tang T. 37 shi litre hynrei ha ka Ri lajong pat, ki nongshongshnong ka Ri kin hap ban siew ïa kajuh ka petrol ha ka dor ba kot haduh T. 78-79 shi litre.
Ka kong Shylla kala buh ruh ïa ka jingkylli ïa u Modi da kaba ong “Balei ba phi lute na ka Ri”. Kala ong ba ka jingpynkiew dor ïa ka petrol, diesel bad ki tyndong lyer shet jingshet kala ktah jur ïa baroh ki nongshongshong ka Jylla haba kdew ruh ba kane ka jingkiew dor ka petrol diesel, ki dor jong ki mar bam mardih ha ki Iew ki Hat ruh kila kiew palat liam bad ktah ïa baroh u paidbah.
“Ngi la pynlong ïa ka jingïakhih khang ba ka Sorkar kan pynhiar noh ïa ka dor jong ka petrol, diesel bad ka tyndong lyer shet jingshet khnang ba ka ïoh ka kot u paidbah kan nym shah ktah” ong ka kong Shylla haba pyntip ruh ba na ka liang ka Mahila Congress kan sa phah jingthoh sha u Myntri Rangbah ka Jylla u Conrad Kongkal Sangma ba un pynduna noh ïa ka VAT jong ka petrol.
Ha kajuh ka por, ka Meghalaya Pradesh Mahila Congress kala ther tyngeh ruh ïa ka Sorkar u Narendra Modi halor ka jingbym lah ban wanrah ïa ki lad ki lynti ki ban ai jingshngaiñ ïa ka longryngieng jong ki Kynthei hapoh ka Ri.
Ka Kong Shylla ka ong “Ki kam bymman pyrshah ïa ki Kynthei kala nang kiew na ka sngi sha ka sngi ha baroh kawei ka Ri India. Ki kynthei ki shah leh beijot, ki kynthei ki shah pynïap, shaei kata ka jingshngaiñ ki Kynthei”.