Press "Enter" to skip to content

Sam borti bret ñiut ka Shnong sha 300 tylli ki rympei iing

Nongpoh, Nailur, 08: Ban wan rah ïa ka khuid ka suba ha Shnong ha thaw bad ruh shi bynta ban hikai sha ki paidbah nongshong snong halor ka jingdonkam ban lehkhuid leh suba, ka Dorbar Shnong Lumnongrim Dewlieh ha Ri Bhoi ka la sam syndon da ki borti bret ñiut sha ki 300 tylli ki longïing jong ka shnong.
Ïa kitei ki borti bret ñiut la sam sha ki paidbah nongshong shnong ka Shnong Lumnongrim Dewlieh ha ka jingïalang kaba la long ha ka sngi Balang ha ka shnong Lumnongrim, ha kaba la wan ban shim bynta da ki paidbah nongshong shnong bad ki nongïalam Shnong ha ka jingïalam u Bah Eddie G. Kharbani kum u Rangbah Shnong katei ka Shnong.
Na ka liang ki paidbah nongshong shnong ruh ki la pynpaw ïa ka jingkmen halor kine ki jingïoh jngai ki nongïalam Shnong ban wan rah ïa ka khuid ka suba ha Shnong ha thaw bad kum ki paidbah ki la rai ruh ban ai ka jingïatrei lang na ka bynta ban wan rah ïa ka khuid ka suba naduh ing haduh ha bar hapoh ka Shnong ka thaw.
U Rangbah Shnong ka Lumnongrim Dewlieh, u Bah Eddie G. Kharbani, u la ong ba kane ka dei ka sienjam kaba la nyngkong eh ba la sam ïa ki borti bret ñiut sha ki nongshnong bad ka thong jong ka Shnong ka longban wan rah ïa ka khuid ka suba naduh ïing haduh ha bar ba kum ki paidbah ki dei ban sngewthuh ïa ka jingmyntoi baki ïoh na ka khuid ka suba.
U la ong ruh ba kum ka Dorbar Shnong kam kwah ba ki paidbah kin shu bret pathar ïa ki jaboh jabaiñ sha ki jaka paidbah, namar kane ka wan rah ym tang ka jingma ïa ka koit ka khiah, hynrei kan ktah ruh wat ïa ka mei mariang khamtam ka jingbret pathar ïa ki plastik ne ki bitor plastik kiba ym pyut bad ki pynjot pynban ïa ka Mariang.
Kum u khlieh nongsynshar shnong, u la buh ruh ka jingkyrpad naduh ki Samla, ki heprit, ki longkmie ki longkpa bad ki padibah shnong hi baroh kawei ba kin ai ka jingïatrei lang na ka bynta ban pynlong ïa ka shnong kaba khuid kaba suba, namar dei tang ka jingïatreilang ka lah ban wanrah ïa ka khuid ka suba ha baroh ki liang.