Press "Enter" to skip to content

Sha ka KHADC yn ujor ka KSU ba thaw Colony ki mynder ha Majai

Shillong, Nailur, 08: Ka Khasi Students Union (KSU) South Khasi Hills Unit ka la rai ban mudui sha ka Khasi Hills Autonomous District Council (KHADC) halor ka jingthaw ‘Colony” jong ki mynder ri ha ka kyntoit Nayabasti, kaba don hajan ka ktem sha ki shipai Border Security Force (BSF) ha ka shnong Majai, Shella, East Khasi Hills District.
U Samla O. Marbaniang, Asst. Publicity Secretary ka KSU Central Body ha ka jingïakren bad ki lad pathai khubor u la ïathuh ba ka Seng tang shu ïoh jingtip halor ka jingthaw ‘Colony’ jong ki mynder ka la tohkit bad pan jingpynshai na u Sordar Shnong ka shnong Majai.
“Tang shu ïoh jingtip halor ka jingmih kane ka ‘Colony’
kaba thymmai ha ka kyntoit Nayabasti kaba don markhap bad ka ktem sah ki shipai BSF, ngi la phah tohkit bad pan jingpynshai ruh na u Sordar ka shnong Majai,” ong une nongïalam ka KSU ha ka jingïakren bad ki lad pathai khubor.
Ka seng mynta ka sngi ka la lum ruh ïa ka jingïalang jong ki nongkhaii mawshun hapoh ka jingïalam u Bah P. Lyngdoh, President bad u Bah Methos Marweiñ, General Secretary bad ha ka jingïadonlang u Sordar ka shnong Majai.
Katkum ka jingïathuh jong u Sordar ka shnong Majai, u Syiem ka Hima Sohra, ula phiah ïa ka jingsynshar ba u Sordar Majai un synshar ïa ki shnong bashong basah ki Khasi katba u don pat u Gaunbura uba ban synshar ïa ki mynder bad ki bar jylla kiba shong basah ha Nayabasti.
“Ngi la shim ïa ka rai ban phah da ka jingthoh sha ka KHADC ban dawa ba dei ban pynduh pyndam mardor ïa ka iktiar ba la pynkup da u Syiem ka Hima Sohra ha u Gaunbura namarba dei na kitei ki Gaunbura ba ki bar jylla ki ju ïoh ban riehtngen ha katei ka thaiñ,” u la ong.
Ha katei ka jingïalang la rai ruh ban khot sa ïa ki trai par mawshun ka thaiñ Majai ban kylli tohkit bha halor ka jingwan ki bar jylla, namarba ki nongkhaii ki la kam ba kim dei kiba aikam ïa ki bar jylla hynrei la suba ïoh dei pynban ki trai par maw kiba ai kam ïa ki.
Na ka liang u Sordar, ki nongkhaii ki la kubur ba ka jingwan tuid ki bar jylla kiba dei ki durkhmat thymmai ha ka thaiñ Majai ha kine ki sngi ka la jur bha bad ki la poi da ki spah ngut bad kitei ki shong ki sah ha Nayabasti.
Utei u nongïalam ka KSU u la pynpaw ruh ba ka jingwan poi kitei ki khmat thymmai ha Nayabasti ka long hadien ka jingpyllait ka Sorkar Assam ïa ka kyrteng jong ka National Register of Citizen (NRC).