Press "Enter" to skip to content

Tuid ki paidbah ban sngewlem ïa u samla Antistone ba shah tangon ha Mawlai Nongpdeng

Nga la map ïa kiba shoh ïa u hymmen jong nga: Habandamon
Shillong, Nailur, 08: Ki paidbah na kylleng, ba kynthup ïa ka kynhun ki nongniah taksi na Mawlai bad ki bahaing hasem mynta ka janmiet sngi saitjaiñ ki la pynlong da ka jingthang mombati ban pynpaw ïa ka jingsngewlem halor ka jingshah ktah kti bad shah shoh pynmynsaw u samla Antistone Ranee ha ki katto katne ngut ki briew ha Mawlai Nongpdeng ha ka miet 10 tarik, Nailar kat haduh ba un da khladnoh na kane ka sla pyrthei.
U Samla Antistone, uba dang 39 snem ka rta u dei uba shong basah ha Mawlai Nongpdeng Block-B u la khladnoh ha NEIGRHIMS Hospital hadien shitaiew ba u la shah shoh haduh ba un da mynsaw jur ha ki katto katto ngut ki runar kiba ïadon kumba 4 haduh san ngut eiei.
Ha kane ka jingshah shoh u la mynsaw jur na ki bynta jong ka khlieh bad la pynkit ïa u ha katei ka miet sha NEIGRHIMS bad
naduh katei ka sngi u la thiah pang hapoh Critical Care Unit (CCU) bad u don hapdeng ka jingbym tip briew.
U Bah Antistone uba ki ju khot ieit u Bah Koi u dei na ka shnong Jaïaw Laitdom, Shillong hynrei hadien ka jingkhlad noh ka kmie jong u, u la leit sah noh bad ka Meideng sha Mawlai Nongpdeng.
Katkum ka jingïathuh ki bahaing hasem, ki la ong ba ha ka miet 10 tarik, u bah Koi katba u dang wan na jingbylla bad thmu ban leit phai noh sha la ing hynrei ha ka por 9:00 baje eiei u la leit ban ïakynduh ïa uwei u paralok jong u ha Mawlai Nongpdeng hajan u Transformer na ka bynta ban ïa pynbeit leit khwai ha ka sngi kaba bud.
Hynrei katba kine ki arngut shi paralok ki dang ïakren ïa khana kynsan kynsan la wan mih ka kynhun ki runar kaba don kumba 4 ne 5 ngut kiba don hapdeng ka rta kaba 25 haduh 27 snem eiei, ki la leit ban wohdaw ïa kine ki ar ngut bad shoh dusmon bad ïa u Bah Koi ki la tied da ki kynja tiar pynmynsaw na ki bynta ka khlieh. La suba jur ba kitei ki runar ki lah ban dei ki khynnah dih drok.
Ki bahaing hasem ki la kynnoh ba ka jingshoh ïa u Bah Koi ka dei beit ka jingthmu ban pynïap namarba um tip briew shuh bad ka snam ka la lyngkien ha madan. Kitei ki runar ki la phet krad na katei ka jaka hadien ba ki la pynmynsaw ïa kitei baroh ar ngut shi paralok.
Ki bahaing ki la ïathuh ba u Bah Koi u dei u briew uba shisur shi dur bad um ju don daw badno badno bad u dang shu leit sah sha Mawlai Nongpdeng dang katto katne por mynta hadien ka jingkhlad ka kmie.
Halor kane ka jingjia, ki bahaing hasem ki la pyntip sha ki Pulit ka Mawlai Police Station hynrei haduh mynta ki pulit ki la ïohkem tang ïa uwei uba la tip kyrteng kum u Banjop Dkhar uba sah ha Mawlai Nongpdeng Block B.
Ki bahaing ki kwah ba ki bor ka aiñ ki dei ban kem lut ïa baroh kiba donkti bad ban pynshitom katkum ki kyndon ka aiñ namar ka jingpynïap dusmon ïa u briew uba lui lui bad kaba la pynshong syier lut ïa kiwei pat.
Ha kane ka jingthang mombati sngewlem ba la pynlong da ka kynhun ki nongniah taksi na Mawlai la wah ruh ïa ka dur jong u samla Antistone Ranee bad ki placard kiba don ïa ki kyntien pynrem ïa ki runar ba donkti ban shoh pynmynsaw ïa une u samla.
“Ngi dawa ïa ka jingtohkti kaba stet halor ka jingshah pynïap dusmon u Bah Antistone Ranee, khnang ban ïoh kem ïa ki nongleh kam bymman,” ong kawei na ki jingthoh hynne ka sngi.
U Samla Habandamon Ranee, u para jong u samla Antistone Ranee, haba kren ha kane ka jingïalang sngewlem u la ong, “nga la map ïa kiba shoh pynmynsaw ïa u hymmen jong nga.”