Press "Enter" to skip to content

Ban skhem u pud, pynshlur ïa ki paidbah ban sah bad sengkam ha khappud : HSPDP

Mynta yn kynduh u CM bad ophisar halor u pud u sam
Shillong, Nailur 13 : Ka Hill State Peoples Democratic Party (HSPDP), kawei na ki sengsaiñ pyrthei kaba la ieng ban ïakhun ban ïoh noh ïa u pud u sam ba pura naduh ki phew snem mynshwa, ka la ai jingmut ïa ka sorkar jylla ba kadei ban pynshlur ïa ki paidbah ba kin leit shong shnong ha ki khappud bad kumjuh ban pynshlur ruh ïa ki samla da ki subsidy kiba kham heh lada ki leit ban seng kam sengjam ha kitei ki jaka.
Katei ka jingai jingmut jong ka seng lyngba u General Secretary jong ka, Bah Renikton L Tongkhar, kadei halor ka jinglum jong u Myntri Rangbah ka Jylla, Conrad K Sangma ïa ki ophisar kumjuh ïa ki Myntri Sorkar ha kane ka sngi Thohdieng ban ïa kren halor u pud u sam bad ruh ïa ki lad ki lynti kumno ban ïoh pynbeit bad pynkut noh ïa ka jingkajia pud bad ka jylla Assam.
Haba kren halor katei ka phang utei u nongïalam ka HSPDP u la ong ruh,“Katba ngim pat lah ban pynbeit, la sngewdei ba ka sorkar kan pynshlur ïa ki paidbah ba kin leit shong shnong ha kitei ki khappud bad ruh ban ïarap ïa ki samla ban sengkam seng jam ha kitei ki jaka namar ka jingdon jong ki, ka la pynskhem lypa ïa ka jinglong trai ïa u pud u sam,” ong u General Secretary ka HSPDP, Bah Renikton L Tongkhar.
Da kaba pynkynmaw ba naduh u President ba nyngkong ka party, Bah Hopingstone Lyngdoh (Bam Kwai ha Dwar u Blei) u la ieng ha kajuh ka nongrim ban ïoh noh ïa u pud u sam uba shai bad pura, u Bah Renik u la ong ba ka sorkar ka la dei ban pynshlur da ki jingkyrshan (subsidy) kaba kham heh na ka bynta ki samla kiba leit ban sengkam sengjam ha kitei ki jaka khappud. “Lada dei na ka 30 persen ba dei ban ai, ka sorkar jylla ka la dei ban kyntiew noh sha ka 40 persen khnang ba kan long kaba kham kyrpang bad pynshlur ruh ïa ki,” ula ong.
U Bah Renik u la ong ruh ba lada ki trai shnong ki la don lypa ha kitei ki khappud kynthup ïa kiba seng kam sengjam ka la pynsuk shibun wat ïa ka sorkar pdeng ban peit namar ki la dei lypa ki nongpynskhem ïa u pud u sam.
Katkum ka jingong jong u, lada kyrkieh katno katno ruh hynrei katba dang don ka jingïa kren, donkam ban mait lynti da kiwei pat ki lad khnang ba ka kam kan seisoh.