Press "Enter" to skip to content

Ha Mawkyrwat pynshai paidbah halor ka Lineage Bill 2018

Mawkyrwat, Nailur 13: Ka Hynñiewtrep Youths’ Council (HYC) jong ka South West Khasi Hills District ha ryngkat ka jingïatreilang bad ka Khasi Autonomous District Council (KHADC) hynne ka sngi palei jong ka taïew ka la ïoh ban pynshai paidbah halor ka KHADC Social (Second) Lineage Amendment Bill 2018 ha ïew Mawkyrwat.
Ha kane ka sngi la ïadonlang u bah H.S. Shylla, CEM ka KHADC, u bah Hadrian Lyngdoh, MDC ka Mawkyrwat, u bah Manstudy Nongrem, MDC Langrin, u ‘Paiem Niandro Syiemiong,  Syiem ka Maharam Syiemship, u ‘Paiem Kawangbor Syiemiong, Syiem jong ka Nobosohphoh Syiemship, ka kong Purity K. Phawa, General Secretary ka STIEH, ki nongïalam jong ka seng HYC bad ki paidbah kiba la wan ban sngap ïa kane ka jingpynshai.
U bah Hadrian Lyngdoh haba ai jingkren ha kane ka sngi u la ong ba kane ka aiñ ka dei kaba biang tam na ka bynta jong ngi ki Khasi bad bynrap ruh ba kane ka aiñ kam dei tang na ka bynta ki kynthei hynrei ka dei ruh na ka bynta jong ki shynrang Khasi ba katba lah kin nym leit shongkurim bad kiwei pat ki jaitbynriew. “Nga ngeit ba ha kane ka District, shispah percen kin kyrshan ïa kane ka aiñ”, bynrap shuh shuh u bah Hadrian.
U bah Manstudy Nongrem haba kren ha kane ka sngi u la wer lang ïa ki paidbah ban kyrshan ïa kane ka aiñ bad ban wer lang ruh ïa kiwei khnang ba kane ka aiñ kan treikam noh. “Ki don kiba pyshah ïa kane ka bill ba la shna da u CEM hynrei kine kiba pyrshah ki dei kito kiba shongkha ïa ki dkhar”, ong u bah Man. “Ngi donkam ïa kane ka bill ban ïada na ka bynta ka jaitbynriew kaba rit jong ngi ka ban teh lakam nangne shakhmat ïa ki kynthei ba kin ïa poikha bad kiwei pat ki jaitbynriew”. Ha ka jingkren jong u bah H.S. Shylla, CEM ka KHADC u la ong ba kane ka aiñ shisien ba la dep rai kan long beit kaba khlaiñ namar ka Constitution ka la dep ai ka bor ban thaw aiñ. “Kine kiba shongkha khleh ki long kum ki agent ban nang khring ïa ki Khasi ha ka kam shongkha khleh”, ong u bah Shylla. “Ïa ka shongkha ba la dep ngi hap ban shu hun ngim lah leh ei ei shuh”. Kane ka aiñ ka dei ka aiñ ba la shna hi ha ki shnong Khasi jong ki kba la don lypa ha ki briew jong ngi kiba khang pyrshah ban ïashongkha bad kiwei ki jaitbynriew bad ka KHADC ka dei tang ka ban pynbit pynbiang khnang ba kan don ka jingthoh bad ba kan khlaiñ. Ka hok jong iwei i briew kam dei ban pynjot ïa ka hok jong ka Jaitbynriew. “Ngi ki Khasi naduh ki longshwa manshwa ngi kham khuslai na ka bynta ki kynthei” bynrap u CEM.
Ka kong Badarity Lyngdoh Nonglait, ka dkhot jong ka STIEH ka la ong ba ki paidbah ki dei ban long kiba ïatylli ban ïakhun ba kane ka aiñ kan treikam noh khnang ba ka kynti ba la buh da u longshwa manshwa kan sah ha ka Ri ka jong ngi. Shuh shuh ka la ong ba kane ka jaitbynriew jong ngi mynta la shah pynkylla ha kiwei pat ki jaitbynriew bad bynrap ruh ba kiwei pat ki jaitbynriew ki kwah ban shongkha ïa ki Khasi khnang ba ki khun jong ki kin ïoh ïa ka bhah na ka bynta ki riewlum (Scheduled Tribe). Ka la ai ka jingïaroh ruh na ka bynta ka Mawkyrwat kaba lah ban ïaineh ha ki lynti ba la pruid da u longshwa ban nym shah ïa kiwei pat ki jaitbynriew ban wan shongkha ha kane ka thaiñ kaban long ruh ka nuksa na ka bynta kiwei kiwei pat ki jaka jong ka Ri Khasi. Ka la kren ruh shaphang ki border ha kaba haduh mynta na ka liang ka Ri Khasi jong ngi ka khlem pat lah ban tehlakam ïa ka jingwan tur kyrthlep jong kiba nabar kaba wanrah ïa ka jingma ïa kane ka Ri Khasi jong ngi.
La pynïaid ïa ka jingïalang da u bah Arbok Kharjahrin, President ka HYC South West Khasi Hills District, la ïoh ka jingpynshit pynshngaiñ lyngba ka drama lyngkot na ka Kynhun Biria U Maram bad ka jingkren khublei na u bah Moonkingstar Paliar, General Secretary ka HYC, South West Khasi Hills District.