Press "Enter" to skip to content

Hadien 40 snem da ka mynsiem ba khia mih noh u Bah Lapang na ka Congress

Ba leh bym khein snep ka AICC ïa ki dkhot ba la rim
Shillong: Hadien kumba sawphew snem ba u la shakri ha ka Seng Congress, u Bah DD Lapang ha ka sngi palei u la mih noh na ka Seng Congress bad ka jingmih jong u ruh kam dei kaba u mih da ka mon nalade, hynrei la pynbor da ki nongïalam ka All India Congress Committee(AICC).
Ha ka jingpyllait khubor, u Bah Lapang, uba la long u Myntri Rangbah, u President ka MPCC, u la pynpaw ba u la mih da ka mynsiem kaba khia bad da ka jingbymbanse, hadien ba ka AICC, ka la phah shongthait noh ïa ki nongïalam ba la rangbah bad ba la tymmen, kaba mut kam donkam shuh ïa ka jingnoh synñiang jong ki. “Kane ka jingleh ka AICC, ka pynlyngnga ïa nga bad pynbor ruh ba ngam kwah ban don shuh ha ka Seng, la ong u Bah Lapang ha ka shithi ba u la phah sha u President ka AICC, u Rahul Gandhi.
Namar ka rta jong u ka dang biang bad ka jingkoit jingkhiah ruh ka dang biang, u Bah Lapang, u la pynpaw un dang ïai shakri ïa ka ri, ïa ka jylla bad ïa ki paidbah kumba ju long baroh shi katta.
Da kaba pynpaw ka jingsngewkmen ba u la shakri ïa ka Congress ha kine ki sawphew snem, u Bah Lapang, u la ong ba ki don ki por ba u len lade ruh tang na ka bynta ka jingbha bad ka jingïaid beit ka Seng.
Lah ban kdew hangne ba u Bah Lapang, uba la long Myntri Rangbah kumba san sien ïa ka jylla, u la rai ban nym ïakhun ïa ka elekshon MLA kaba la long mynta ka snem bad ailad ïa u Bah Mayralborn Syiem ba un ïakhun ïa kane ka elekshon, ha kaba u la ïoh ruh ïa ka jingjop. U Bah Lapang, u la ïakhun nyngkong eh ïa ka elekshon MLA ha u snem 1972 bad jop kum u kyrtong shimet.