Press "Enter" to skip to content

Ka jingkren u Dr. Mukul ha ki Kotkhubor

Bah Philip Marwein, Shillong-2.

Ha ki Kotkhubor Khasi bad Phareng kiba la mih hynne ka sngi (Nailur 11 tarik) u Dr. Mukul Sangma, nongialam ka Congress, u la kren shai ba ka Congress kam kyrkieh ban thaw sorkar da kaba pynkhyllem noh mar mar ïa ka sorkar MDA ba ïalam da ka NPP. Ai lad shuwa ïa ka sorkar MDA ba kan kmen toh-hoh ban synshar bad ai ba ki paidbah jong ka Meghalaya kin da ioh mad shuwa ban tip la kham lah ka sorkar NPP ne ka sorkar Congress, U la ong ruh ba ki paidbah Meghalaya ki dei kiba stad ban bishar bad kin sa tip kumno ban leh.
Kiba kum kine ki jingkren ki dei ki jingkren da rapjot suda. Hato phi tharai ba lada ïoh lad bad lada lah ban pynkhyllem ïa ka sorkar MDA ka Congress kan shu iehjem? Kan kynrup kloi lan ban leh kumta. Mar syndep niew ïa ki vote ha general election 2018 ruh ka Congress ka la ksaid jur katba lah ban ioh thaw sorkar bad ki party rilum hynrei kam shym la lah namarba, ki la noh lang bad ka NPP ban ïathaw sorkar ba kim shym la sngewtynnad bad kim mon shuh ïa u Dr. Mukul Sangma, u ba la ïoh bat kum u Chief Minister la kumba 10-11 snem lynter bad ha kajuh ka por kim sngew ïahap bad ka rukom leh-heh bad donbor jong u ha ki snem ba u la long Chief Minister, ym ba ki isih ïa ka Congress. Wat kiba bun ki MLA bad Minister jong ka Congress ruh ki la phet noh na ka Seng ban leit ïasoh bad ka NPP namar kijuh ki daw. Kumta, ka jingkren jong u ka long tang ban pyllait jynhaw bad da rapjot, ki paidbah kim pdiang ïa ki nia jong u, namarba ki paidbah ki kham shemphang ban ïa u nongkren. Ha ka jingshisha u Dr. Mukul Sangma u dei uba stad, u ba shemphang bad uba sianti bha, kham lah ma u ban ïa kiwei kiwei ki nongïalam Congress ha Meghalaya hynrei lada kiwei kim mih shakhmat bad kim pynpaw ïa ka jinglah jong ki, ka jingïalam ïa ka Congress ha Meghalaya kan dang neh hi bad u. Lehse kiwei ki bym pat ioh ia ka lad ban wan shakhmat ki kham lah ban ïa u Dr. Mukul Sangma, mano ba tip. Ai ba kin pynpaw da ki kam jong ka jinglong bad jinglah ban ialam. Ki paidbah jong ka Meghalaya kim isih ia ka Congress hynrei ki la ngiah ia ki katto katne ki nongialam, kynthup ïa u Dr. Mukul Sangma. Hynrei, lada ki rieh khop khop, ïa ka jingïalam yn dang ïai bat sah hi ma u.