Press "Enter" to skip to content

Khlad I khunlung ha kpoh ka kmie ba thmu leit kit sha Hospital

Nongstoiñ, Nailur 13: Ha kawei ka jingjia kaba sngewsih, iwei I khunlung I la khlad noh ha kpoh ka kmie ha ka por ba la kit ïa ka kmie ban leit buh ha Riangdo Community Health Centre.
Katkum ka khubor ba la ïohlum, la ong ba ha ka lah sngi u Blei jong kane ka taïew, kawei ka longkmie (ba la buhrieh kyrteng) na ka shnong Mawkyllon kaba hap hapoh ka Mawshynrut Constituency kaba jngai kumba 23 kilomitar na Riangdo, hadien ba ka la sngewthuh ba ka por ban kha ïa I khun ka la jan, kumta kiba ha ïing jong ka ki pynkit ïa ka sha Riangdo CHC na ka bynta ban kha ïa I khun.
La ong ruh ba namar ba katei ka longkmie kam lah ban ïaid kjat namar ka jing armet, kiba ha ïing jong ka ki la shna da ka kynja krong siej bad la shu pynkit da u briew. Nalor nangta, ka jingjngai bad ka jingsniew jong ka surok ba ki ïaid, ka la shim por haduh phra kynta ban kit ïa katei ka longkmie bad hap ban shong thait bun jaka shwa ban poi ha surok kali. Hadien ba la poi ha ka jaka sumar, ki Doctor ki la eksamin bad pynkha I tei I khunlung, hynrei sngewsih ba I la dep khlad noh naduh ka kpoh ka kmie shuwa ban poi ha katei ka jaka sumar.
Ka khubor ba ki ïoh na ki Doctor ka la pynshaiong ngaiñ ïa katei ka longkmie khamtam bad ïa kiba haïing hasem baroh, namar hapdeng ka jingkyrmen bad jingap khmih lynti jong ki ban ïohi ïa ki khunlung ba la kha sha pyrthei, hynrei ki la ïoh pdiang pynban ïa ka khubor kaba sngewsih kthang ha Hospital.
Halor kane ka jingjia, na ka liang jong ki riew rangbah katei ka thaiñ haba ïa kren bad u nongthoh khubor, ki la ïathuh ba kiba kum kitei ki jingjia kim dei shuh kiba dang thymmai. Hynrei, ki la ju jia man ka por naduh ki snem kiba la leit. Ka daw kaba kongsan ka dei tang namar ka jingbym don ïa ki surok kiba bit kiba biang ban ïaid kali. Ki la ong ruh ba watla ka surok na katei ka shnong Mawkyllon ka la don, hynrei ha ka por lyiur wat ki trok ruh kim long satia ban ïaid namar ka jingsniew ka la long shaba palat.
Ki la ong ba na ka liang ki Nongsynshar shnong bad ki Sengbhalang kiba don ha katei ka thaiñ, da ki bun sien bun wat ki la tur la dawa na ka sorkar ba kan pynbha ïa ki surok, hynrei ym don ba patiaw bad ym don ba kheiñ briew ïa ki nongkyndong. Ha ka jingshisha ha katei ka thaiñ ki don bun bah ki shnong ki thaw naduh thaiñ Riangsih haduh Nongjri, Langdongdai Mawsmai haduh Malangkona bad ki paidbah nongshong shnong ki hap ban ïaid bad ïa beh kam beh jam beit da ka kjat haduh mynta mynne. Ki sorkar ki leit ki wan kawei hadien kawei, hynrei baroh ki shu snagp mynthi bad kim patiaw ei ei ruh em.
Na ka liang jong ki riew paidbah nongshong shnong ka thaiñ ki la kren kut lad ruh da kaba ong, ba ha ki snem ban wan lada ki surok kin dang long kumjuh, na ka liang jong ki kin pynlong da ka jingpakhang shnong ban nym shah ïano ïano ruh ba kin dang leit thep vote. Ki la ong ba kam don jingmut ban shu pynjop election ïa kito ki kyrtong, hynrei ynda ki la jop ki klet noh ïa ki paidbah.