Press "Enter" to skip to content

Kular u CM ban bei ia ka tulop ki nonghikai SSA na ka Pla Tyngka ka Sorkar

Shillong, Nailur, 13: U Conrad K. Sangma, Myntri Rangbah ka Jylla, mynta ka sngi palei u la kular sha ki nongïalam ka Meghalaya SSA School Association (MSSASA) ban bei ïa ka tulop ba la pynduna da ka Ministry of Human Resources Development sha baroh ki nonghikai skul SSA jong ka Jylla baroh kawei.
Dang shen, ka Project Approval Board (PAB) jong ka Ministry of Human Resources Development (MHRD) haba pyntreikam ïa ka Integrated Scheme for School Education ba la tip thymmai kum ka Samagra Shiksha Abhiyan naduh u snem 2018-19 ka la pynduna noh ïa ka jingsiew tulop sha  baroh ki nonghikai skul SSA, kata, ha ka kyrdan Lower Primary na ka T. 19044 sha ka T.15 hajar shi bnai bad na ka T.20,493 hajar sha ka T.20 hajar shi bnai.
Ki nongïalam ka MSSASA ha ka jingïakynduh ïa u Conrad K. Sangma ki la aiti ruh da ka jingthoh ban pynsngew halor kane ka jingpynduna noh ka MHRD ïa ka tulop ki nonghikai skul SSA.
“U Myntri Rangbah u la kular ban bei ïa ka jingsiew tulop kaba la pynduna da ka MHRD sha baroh ki nonghikai skul SSA ha ka jylla,” ong u Bah Aristotle Rymbai, President ka MSSASA haba ïakren bad u Mawphor.
“Hynrei u Myntri Rangbah u la pynpaw ba kan dang shim por sa lai ne haduh saw taiew ïa ka Sorkar ban pynurlong,” la bynrap u Bah Aristotle.
Na ka liang ka Seng mynta ka miet sngi palei ka la shong ruh ïa ka jingïalang bakyrkieh hadien ka jingïakynduh ïa u Myntri Rangbah ha kamra treikam jong u ban ïakren sani halor kane ka jingkular jong u Conrad Sangma.
Lah ban pynkynmaw hangne, ki nonghikai skul SSA ha ka jylla baroh haduh mynta kim pat ïoh satia ïa ka tulop kaba la kot sha ka sha ka san bnai kynthih kata naduh u bnai Ïaiong 2018 haduh u bnai Nailar 2018 bad ïa ka Arrear kaba dei naduh u bnai Nohprah, 2016 haduh Jymmang, 2017.