Press "Enter" to skip to content

Kular u CM ban wanrah resolution ban ithuh ïa ka ktien Khasi bad Garo

Kyrshan sa ka HSPDP ïa ka Resolution halor Ktien Khasi

Shillong: U Myntri Rangbah ka jylla, u Conrad Sangma, u la kular ïa ki nongïalam ka Khasi Authors’ Society(KAS) ban wanrah da ka Resolution na ka liang ka sorkar na ka bynta ban ithuh noh ïa ka ktien Khasi bad Garo ha ka khyrnit ba phra jong ka riti synshar ka ri India.
Kane ka jingkular ka long ha ka jingïakynduh jong u bad ki nongïalam ka KAS ha ka sngi palei janmiet ha karma treikam jong u ha Main Secretariat.
“Ngi la ïakynduh ïa u Myntri Rangbah bad u la ong ba ka sorkar kan wanrah ïa kane ka Resolution ha kane ka sien shong dorbar synrai kaban sdang naduh ka 21 tarik mynta u bnai”, la ong u Dr. DRL Nonglait, President ka KAS, haba ïakren bad u Mawphor.
U President ka KAS, u la ïathuh ruh ba na ka liang ka sorkar hadien ba ka ïingdorbar ka la mynjur ïa kane ka resolution, kan nym pynslem ban phah pat sha ka tnad kampohïing jong ka ri India ba kan pynkhreh pat ban rah ïa kane ka kam ha Parliament.
Katkum ki rukom treikam, ïa kano kano ka ktien ban ïoh jingithuh donkam ban mynjur shuwa da ka ïingdorbar thawaiñ ka jylla bad hadien kane hap phah sha ka Ministry of Home Affairs ne ka tnad pohïing jong ka sorkar pdeng ba kan rah hapoh Parliament namar ba ka donkam ïa ka Constitutional Amendment ne ka jingpynkylla khyndiat ïa ka riti synshar jong ka ri, kaba donkam pat ban ïoh jingmynjur da ar na ka lai bynta jong ka ïingdorbar thawaiñ ka ri.
“Ngi khmih lynti ba u Myntri Rangbah un lah ban pynkohnguh ïa ka sorkar pdeng ba kan rah ïa kane ka kam ha Parliament, kaba lehse kan long ka histori jong ka jylla”, la ong u Dr. Nonglait.