Press "Enter" to skip to content

Kyntait ka KHNAM ba pynduh tiket MP ïa u Bah THS Boney

Ai jingkyrshan ïa ka KAS
Shillong, Nailur, 13: Ka Khun Hynñiewtrep National Awakening Movement (KHNAM) ka la kyntait mardor ïa ka jingpynmih khubor jong u Bah THS Boney ban pynduh tiket na ka bynta ban aireng ha ka elekshon MP, 2019.
“Ka jingpynmihkhubor u Bah THS Bonney, Working President barim ka seng, ba ka CEC ka la pynduh tiket ïa u tang namarba u ïajan bad u Bah AdelbertNongrum ka long kaba bakla bad ka bym don nongrim haei haei ruh,” ong u kyrwoh na u Bah FreewelsonMarpna, General Secretary ka CEC jong ka KHNAM.
Une u nongïalam ka seng u la ong shuh shuh, ‘kum ban shu pynkynmaw, ïa u Bah Bonney, la kyntiew na ka post Chief Adviser sha ka kam Working President da ka jingthmu ban pynpaw ïa u kum u MP Candidate ka seng. Hynrei u Bah Bonney, da lade hi u la resain noh, bad hadien ba ka seng ka la ïai-ap la katto katne por, um shym la weng noh (withdraw) ïa ka shithi iehnoh kam, kumta ngim don lad da kumwei pat lait satang ban shu pdiang beit ïa ka jingiehnohkam jong u.”
“Katkum ka riti treikam jong ka Seng (Constition), shisien ba um dei shuh u dkhot, um lah shuh ban ialeh election na ka seng, lait sa tang lada rung dkhot biang bad buh application da kawei pat,” ong shuh shuh u kyrwoh na ka KHNAM.
“U Bah Bonney u la buh ruh ki jingkylli ha kaba ïadei bad ka jingkhlaiñ jong ka CEC ban ïalam bakla ïa u paidbah. Kumba ka long mynta, ka CEC jong ka seng ka khlaiñ bha, ym don hi ruh kata ka CEC barim lane bathymmai bad ka phang ban beh seng ïa u Bah Adelbert Nongrum kumba la dawa da u Bah Bonney, kam pat mih,” u la ong.
Ka KHNAM ha kajuh ka por, ka la ai jingkyrshan ba radbah ïa ka jingthmu bad jingdawa jong ka Khasi Author Society (KAS) ban pynrung ïa ka ktien Khasi ha ka Eight Scheduled jong ka Riti Synshar ka Ri India.
“Ka la dei ka por ïa ngi lang baroh bad ruh ïa ki seng bapher bapher ban ïatylli lang kawei namar kane ka jingthmu kaba kiba bun ki la kwah lane thrang ban pynurlong,” ong u Bah Pyndap Saibon, President ka KHNAM.
“Ka Sorkar Jylla ka dei ban mynjur da kawei ka rai ha Ingdorbar Thawaiñ halor kane bynta bad ban phah ïa kane ka jingthmu sha ka Sorkar India,” u la ong.
Ka KHNAM ka kyrshan ruh ïa ka prokram ba la pynbeit da ka KAS ha ka 22 tarik mynta u bnai bad kyrpad ruh ïa baroh lang ban ïashim bynta ha kane ka jingïaïaid paidbah da ka jingsngewkhia ïa la ka jong ka ktien ka thylliej.