Press "Enter" to skip to content

Lano u pud u sam ka Meghalaya bad Assam un beit noh

Ka jingïakren pynbeit pud hapdeng ka Jylla Assam bad ka Meghalaya mynta ka dang long halor suiñ namar ym pat lah satia ban pynbeit lane ban pynkut noh ïa kata ka jingïa kajia pud hapdeng kitei ki ar tylli ki jylla. Haduh mynta ki paidbah nongshong shnong ha khappud ka Meghalaya bad Assam ki mad ïa ki jingeh nalor ki jingshah pyndik kiba lei phew har rukom ha ka Assam kaba peit beit kliaw tang kumno ban ïoh kyntur sha u pud u sam ka meghalaya. Ka Jylla Assam ka ïaleh katba lah ban pyntur khamtam da ki pulit ban leit tuklar man ka por ïa kino kino ki jingshna, ki jingtei bad kiwei kiwei ki kam ha kito ki jaka ne ki shnong kiba don ha u pud u sam ba ka Meghalaya ka kam trai.
Ka jingïasoi soskular hapdeng ka Jylla Assam bad Meghalaya ban burom ïa ka ‘Status Quo’ imat kam shym la treikam kumba ka dei, namar kumba ka paw hi imat dei tang ka Jylla Meghalaya kaba burom ïa katei ka Status Quo
Ka jingwan kaba man ka por jong ki pulit Assam ban leit peit ne jurip ïa bun ki jaka ha khappud kynthup wat ïa ki jaka jngohkai pyrthei ha West Khasi Hills, Ri Bhoi bad wat ha rilum Jaiñtïa kim dei shuh kiba dang thymmai hynrei kaba la man ka por. Ka jingwan prong jong ki pulit Assam sha u pud u sam ka Meghalaya kam dei shuh kaba tang shisien, hynrei da ki bun bun sien kat haduh ba ki paidbah nongshong shnong ha kitei ki thain ki pynpaw ïa ka jingshong syier haduh katta katta halor kitei ki kam jong ka Jylla Assam. Kine kiei ei ki jingjïa kiba wanrah ïa ka jingshong syier jong ki paidbah nongshong shnong ha khappud.
Ki sorkar ki leit bad ki wan, hynrei haduh mynta kane ka jingbym don ka Jylla Meghalaya ïa u pud u sam uba biang ka pynshitom jingmut haduh kattta katta ïa ki paidbah nongshong shnong ki bapli ban ieng ruh kynduh bad shong ruh jhieh. Ha West Khasi Hills, ki paidbah ruh ki mad ïa kajuh ka jingeh na ka jingshah pyndik ha ka Jylla Assam kaba wanrah syndon da kiwei ki jaidbynriew ban shong ban sah bad ban pynlong ïa ki kum ki diengkper ban pynïar ïa u pud u sam bad ban ïada ïa u pud u sam jong ka. Kum kine kiei ei, mano ban law ïa une u ksai uba la sohkyrdot haduh katne katne. Ka daw baroh ka dei ki nongïalam ka Jylla naduh ba la ïoh ïa ka Jylla Meghalaya kim don por ban pynbeit ïa u pud u sam, hynrei ki kmen tang ba la ïoh jylla bad ki klet noh pat ïa u pud u sam uba long u laiñ jingim uba kongsan ïa ki paidbah kiba shong ha kitei ki thain khappud.
Nalor ka Jylla Meghalaya ka dei kaba rit ha ka jingïar kaba don ïa ka jingheh kaba dang 22,429 sqkm, hynrei sa ka jingshah klun pat ha ka Jylla Assam bad Bangladesh na ka por sha ka por, khlempep ka jylla kan nangrit nangrit ha ki sngi ban sa wan. m lah ban len, ki nongsynshar ka Jylla ki tip bad ïohi ïa kine ki jingeh, hynrei ki shu shim kabu tang ban ïoh jingmyntoi ïalade ha ki por elekshon ban ïoh khwai vote katba ki paidbah pat ki long kum ki langkñia bad ki sohpdung kiba hap ban mad ïa ki jingeh namar ka jingbym ïohi lem jong ka sorkar bad ki sengbhalang ruh kiba imat tang ha ka por ba dang khluit, hynrei ynda la pjah, ki ruh ki pjah lang.
La katta ruh ka dang don ka jingkyrmen ba ha kane ka sorkar synrop ba mynta ba ïalam da ka National People’s Party ryngkat ka jingïatrei lang bad ka HSPDP, PDF, UDP, BJP yn lah ban weng noh ïa kitei ki jingeh ba ki paidbah baroh shi katta ki mad haba ïadei bad u pud u sam. Ka jingshimti jong u Conrad K Sangma kum u Myntri Rangbah ba thymmai ka Jylla ka pyni ruh ïa ka jingkyrmen ba ka jylla kan ym slem shuh ban ïohi noh ïa uta u pud u sam ba ki ju phohsniew ne mutdur naduh ba ïoh ïa la ka jong ka jylla. Ka jingdon ka sorkar BJP ha Assam bad kumjuh ka jingtreilang ki MLA BJP ha ka sorkar Meghalaya khlem artatien kan pynsuk ïa ka sorkar Jylla ba kan ïa kren ïa katei ka kam bad ka sorkar BJP kaba bat ïa u lakam synshar ha ka sorkar pdeng.
Watla katei ka sorka ka dang ïaid mynta tang kumba hynriew bnai tam hynrei ka jingkhmih lynti jong u paidbah kadei kaba ju bha la ka long ha ka kamai kajih, ka rep ka riang bad khamtam eh haba ïadei bad ka khaii pateng. Kam long ruh kaba suk ïa kane ka sorkar jylla ba mynta ba kan rai ne pynbeit noh ïa u pud u sam tang ha ka shi khyllipmat namar katei ka bynta kadei kaba kyllaiñ bad kaba hap ban da bishar bniah thik pa thik ha ki liang baroh.