Press "Enter" to skip to content

Lap miet ka Sorkar MDA ban bujli DC & SP ka WJHD tang hapoh 7 bnai ka jingsynshar

Jowai, Nailur 13 : Ka West Jaiñtia Hills District kala kylla long ka district kaba kyrpang tam na bynta ka Sorkar Meghalaya Democratic Alliance (MDA) namar ka Sorkar ka lapmiet tang ban bujli Deputy Commissioner ne Superintendent of Police jong ka district wat la kiba bat ïa kane ka shuki kim shym la ïoh satia ban pyndep ïa ka por shakri ne tenure jong ki ha ka district kaba lai snem katkum ka Service Rule jong ka Sorkar Jylla bad kaba duna eh ruh ki dei ban don arsnem hajuh.
Ka tyllong khubor ka kynnoh ba kane ka dei tang namar ka jingbuh sni jong ki katto katne ki MLA ïa ki DC bad SP ka West Jaintia Hills namar ba ki khlem long niang kohnguh ïa ki ha ka por election MLA bad ba kim ïoh ban khyrwait shabi ïa ki katba ki mon.
Dang shen ka Sorkar Jylla ka la hap ban pynmih haduh artylli ki notification ban bujli noh ïa u Deputy Commissioner jong ka District bad lehse kane ka dei ka sien kaba nyngkong eh ha history jong ka Sorkar Jylla.
Ka sorkar lyngba ka tnad Personla kala pynmih ïa ka notification kaba don ia u No. PER/36/2011/Pt.VI/30 Tarik 31/7/2018 ka la rai ban bujli u Bah R Rapthap IAS u DC ka District da u Bah Garod L S N Dykes (IAS) bad u Bah Rapthap yn shimti ïa ka shuki Additional Secretary jong ka tnat Labour.
Hynrei na ka jingpyrshah jong ka tnat Election, katei ka notification kam shym la urlong satia bad u Bah Rapthap u la neh beit ha ka shuki DC.
Ka tnat Personnel ka la pynmih biang ïa ka hukum lyngba ka notification kaba don u No.PER.36/2011/Pt.VI/34 Tarik 27/8/2018 ban bujli u Bah R Rapthap IAS u DC ka District da u Bah Garod L S N Dykes (IAS) bad u Bah Rapthap yn shimti ïa ka shuki Additional Secretary jong ka tnat Labour.
U Bah Rapthap u la aiti noh ïa ka shuki DC jong ka district ha ka 8/9/2018 ha u Bah Garod. U Bah Rapthap u dang bat ïa ka shuki DC tang 1 snem phra bnai namar u la shimti ha ka 31/1/2017.
Mynta ka kynti, ka tnat kam pohïing jong ka Sorkar Jylla ka la pynmih ïa ka hukum ban bujli noh ïa u Superintendent of Police jong ka West Jaiñtia Hills District tang hapoh khatwei bnai ba u shimti ïaka kam SP ba mynta.
Katkum ka tyllong khubor, ka tnat kam pohïing lyngba ka notification kaba don u number HPL.63/2001/PT.1/70 Tarik 12/9/18 ka la rai ban bujli noh ïa u SP ba mynta jong ka West Jaiñtia Hills District u Bah Vivek Syiem, MPS da u Bah Lakordor Syiem, MPS u ba bat mynta ïa ka shuki Principal jong ka Police Training School, Shillong.
Katkum katei ka notification, u Bah Vivek un leit shimti noh ïa ka shuki Principal jong Police Training School na u Bah Lakordor. Hynrei U Bah Lakordor yn bteng ban bat ïa ka shuki Member Secretary jong ka Central Recruitment Board haduh ban dang dep ïa ka kam thungkam thungjam jong ka post Unarmed Branch Sub Inspector (UBSI) bad un bteng ban khmih ïa ki kam ïingkashari bad RTI haba ïadei bad ka kam thung kam thung jam jong ki pulit.