Press "Enter" to skip to content

Pan kaiphod ka Supreme Court ïa ki case ba sahteng ki MLA, MP ka NE

New Delhil, Nailur 13 : Ka ïing bishar Supreme Court myn ha ka Sngi Balang ka la hukum ïa ki Chief Secretary jong ki 19 tylli ki jylla bad ki Union Territory kynthup ruh ïa ki Registrar General (RG) jong ki High Court ba kin ai jingtip bniah halor ki case ba dang sahteng jong ki MP bad MLA.
Kine ki 19 tylli ki jylla ki kynthup ïa kine ki jylla jong kane ka thaiñ shatei lam mihngi kata Arunachal Pradesh, Assam, Manipur, Meghalaya, Mizoram, Nagaland, Tripura bad Sikkim. Katba kiwei pat ki jylla ki dei ka Chhattisgarh, Goa, Gujarat, Haryana, Himachal Pradesh, Jammu bad Kashmir, Jharkhand, Odisha, Punjab, Rajasthan, bad Uttarakhand.
Nalor kine ki Union Territory pat ki long Andaman and Nicobar Island, Chandigarh, Dadra and Nagar Haveli, Daman and Diu, Lakshadweep bad Puducherry.
Ka ïing bishar SC ka kwah ruh ban tip la ïa kine ki case ba sahteng la phah ne em sha ka ïing bishar ba kyrpang (special court) kaba la thung kat kum ka hukum ba la pynmih ha u Nohprah 2017 ban bishar ïa kitei ki case.
Nalor kane ka Bench jong u Justice Ranjan Gogoi, Justice Navin Sinha, Justice K.M Joseph ki pan jingtip kaba shai la kine ki ïing bishar ba kyrpang ki treikam bha ne em.
“Ngi hukum ïa ki Chief Secretary bad ki Registrar General jong ki High Court ban ai jingtip kaba bniah sa katno ki case ba sahteng jong ki MLA bad MP kiba dei ban aiti noh sha ki ïing bishar ba kyrpag” ong ka hukuim jong kitei ki nongbishar.
Ka kwah ruh ban tip la ki 12 tylli ki ïing bishar ba kyrpang ba la dep thung ki treikam bad lada bun ki case dang donkam ne em ban thung shuh shuh ïa ki ïing bishar ba kyrpang ( Special Court).
Ka ïing bishar SC ka pan jingtip bniah na ki CS bad ki RG namar kam hun ïa ka jingai jingtip jong ka Union Ministry of Law and Justice kat kum ka affidavit ba ka la ai sha ka ïing bishar ha ka 11 tarik mynta u bnai.
Kat kum ka affidavit jongka tnad Law and Justice la pynpaw ba ki don haduh 1233 tylli ki case pyrshah ïa ki MLA bad MP kiba la aiti sha ka special court bad na kitei la dep pynkhuid 136 tylli katba kiba dang sahteng ki don haduh 1097 tylli.
Ka ïing bishar ka kwah ruh ban tip katno ngut ki MP ne MLA kiba la shah pynngat kyndon ne shah rai pynrem.