Press "Enter" to skip to content

Shi bnai tulop yn noh synniang u Myntri Rangbah sha ki skul nongkyndong kyntu ban leh lang ia ki MLA

Shillong, Nailur, 13: U Conrad Sangma, Myntri Rangbah ka Jylla mynta ka sngi palei u la pynbna ban noh synniang na ka tulop ba shibnai khnang ban kyntiew ïa ki skul kiba don ha ki jaka nongkyndong ka Jylla Meghalaya.
U Myntri Rangbah u la pynpaw ïa kane ka jingthmu jong u haba kren kum u Kongsan mynta ka sngi palei ha ka jingpynhap pyrda noh ïa ka jingrakhe ïa u mawmer ka jingïaid lynti kaba 60 snem (Diamond Jubilee) jong ka Auxilium Girls ‘ Higher Secondary School, kaba don ha ka shnong Nongthymmai, Shillong ban ai jingshakri sha ki khynnah ha ka liang ka jingnang jingstad.
Ha kajuh ka por, u Myntri Rangbah u la kyntu ruh ïa ki MLA bad kyrpad ruh ïa ki paidbah ka Jylla bad ïa ki Politishian ba kin noh synniang lem na ka bynta ban tei pynbha ïa ki skul ha ki nongkyndong ki bym don wat tang ka tnum, ka paiñkhana kaba khuid, ka umbam umdih kaba khuid bad wat ka bording.
Haba pynpaw ba ka long kaba shisha ba bun na ki khynnah ha ki shnong nongkyndong ka Jylla Meghalaya kiba leit sha ki skul pule kim don satia ki jingmyntoi kumba long lem kiwei pat, u Myntri Rangbah u la pynpaw ka jingsngewsih bad ka jingsngewkhia kaba jur halor kane.
“Ngi la pyrshang katba lah na ka liang jong ngi ban wanrah ïa ka jingkylla dur, hynrei ki don pat ki diengpynkiang bad ki jingeh kiba wan hakhmat. Namarba bun na ki skul ha ki shnong nongkyndong ki dei kiba donkam shisha ïa ka jingïarap, namarkata, nga kyrpad ïa ki Ophisar, ki Nongkhaii, ki Heh spah bad ki Politishian ba kin wad jingtip hi dalade ïa ki skul kiba sahdien tam ha ki thaiñ nongkyndong ban noh syniang katkum ka jingkotbor. Lada ai wat tang kawei ruh ka tin sop iing ne ka ben ka la long ka jingkyrkhu kaba khraw ïa ka skul,” ong u Myntri Rangbah.
U la kyntu ruh ïa ki MLA bad ïa ki nongïalam jong ki Seng Saiñpyrthei ba kin pyrshang ban len lade na ka tulop kaba shi bnai bad noh synniang na ka bynta ban kyntiew ïa ki skul kiba don sha ki shnong nongkyndong ka Jylla Meghalaya.
“Nga la sdang ïa kane mynta na lade bad ngan noh synniang na ka tulop ba shi bnai sha ka skul kaba don ha ka shnong nongkyndong jong ka Jylla. Ngan ai kat kaba donkam,” la ong u Myntri Rangbah bad bynrap, “lada ka don ka jingpynkhih, wat ki riewpaidbah ruh kiba don ka mynsiem ki lah ban noh synniang, namar lada ngi ïatreilang kawei, ka imlang ka sahlang kan sa ïohi ïa ka jingkylla.”
Shuh shuh u Myntri Rangbah u la ong, “ngi hap ban pynthikna, lada ngi don 10 tylli ki Agenda, 5 tylli kin dei na ka bynta ka pule puthi, bad kajuh ka rukom lada don 20 tylli ki Agenda, 10 tylli kin dei na ka bynta ka Pule ka Puthi. Hynrei shah ngan ong ïa phi ba kane ka kam ka dei kaba ïar haduh katta katta. Ngi kwah ban ïohi ïa ki jingkylla dur ha ka tnat Pule Puthi jong ka Jylla ha kine ki khyndiat snem hynrei ngi mad bad ngi ïakynduh pat bun ki jingeh bad ki diengpyngkiang.”
U Myntri Rangbah u la ïathuh ruh ka State Education Policy mynta ka dang don ha ka jingpynkhreh bad shen yn sa pyllait paidbah shwa ban kut une u bnai Nailur.
Ha kane ka sngi la ïadonlang u Ma Lahkmen Rymbui, Myntri ka tnat Pule Puthi, u Bah Charles Pyngrope, MLA ka Nongthymmai Constituency, u Bah Peter S. Dkhar, Deputy Commissioner ka East Khasi Hills District, i Sr. Isabella Suja, Provincial ka Shillong Province, Nongthymmai, Shillong, i Sr. Joplin Suchiang, Principal, Sr. Theresa Phawa, Vice Principal ka skul, ki nonghikai, ki khynnah skul bad kiwei kiwei.
La pyllait paidbah ruh ïa ka School Management System da u Bah C. Pyngrope bad la pyllait ruh ïa ka Souvenir jong ka School da u Myntri Rangbah.