Press "Enter" to skip to content

Yn kapten u JJ ïa ka Meghalaya ha ka Vijay Hazare Trophy

Shillong, Nailur 13: U Jason Lamare (J.J) la jied ïa u ban long kum u kapten ka kynhun ïalehkai kriket ka jylla Meghalaya kaban hiar ïakhun sha ka lympung ïalehkai jong ka Vijay Hazare Trophy kaban sdang naduh ka 19 tarik mynta u bnai bad kane ka kynhun ka la mih hynne ka sngi na ka nongbah.
Ïa kane la pynbna ïa ka mynta ka sngi da ka Me-ghalaya Cricket Association, kaba kum ka jylla, kane kan dei ka sien jam kaba nyngkong ïa ka jylla ba kan ïoh ba kan ïakhun ha kane ka lympung band kumjuh ha ka Ranji Trophy.
Kum u nongïalehkai u JJ u dei u rang ïalehkai ba la mihkhmat ïa ka jylla Assam haki snem kiba la leit noh.
“Kum u nongïalam nga sngew donkam ba ngin ïarap bad kyrshang lang iwei ia iwei, nalor kata nga sngew ba kum ka kynhun, ka Meghalaya kan kham tbit bad lah ban ïalehkai bha ban ïa kiwei pat ki jylla kba dei na kane ka thaiñ shatei lam mihngi” la pynpaw u JJ.
Haba jubab halor ka jingkylli kumno u lah ban pynneh ïa la ka jong ka met ka phad ka jong u hadien ba um shim la ïalehkai shuh la bun bun ki snem, u JJ u la ong ba um juh pynshong thiah thai ïa la ka jong ka met, ha kaba u ïai bteng ban ïalehkai ïa ka kriket, u im sngi ban kilan tista ïa la ka jong ka met bad ïashim bynta ruh ha kiwei kiwei pat ki jait jing-ïalehkai.
Naka liang u coach jong kane ka kynhun ïalehkai ba la thung kyrpang da ka BCCI u Mukund G u pynpaw ba ki lai ngut ki rang ïalehkai ba nabar ka jylla ba la soi kyrpang da ka MCA kin shim ïa ka bynta kaba khraw tam naka bynta ban ïarap ha kaban lam khmat ïa ka kynhun ha kane ka kynti ïakhun kaba mynta.
Kumban shu pynkyn-maw ba ha kane ka lympung ka kyndon aiñ ka BCCI ïa ki jylla ba dang shu ïoh ban ïalehkai nyngkong ha kane ka lympung ka la shah sngew-bha ïa ki ba kin soi ïa ki lai ngut ki rang ïalehkai ba dei nabar ka jylla kum shi bynta ban pynkhlaiñ ïa ka kynhun ka jong ki.
Ha kane ka kynti ka MCA ka la lah ha kan soi ïa ki rang ïalehkai ba kynthup ïa u Gurinder Singh, 26 snem ka rta ba dei na ki thaiñ ka jylla Punjab ba dei artad u spinner uba la mihkhmat teng ïa ka jylla Tripura ha ka Ranji Trophy, u Punit Singh Bisht 32 snem ka rta, ba dei artad u wicketkeeper ba dei napoh ka jylla Delhi bad ba la ïalehkai teng na ka jylla Jammu and Kashmir, nangta ïa ka Delhi Dare Devils ha ka IPL, bad u Yogesh Nagar 28 snem ka rta ba dei artad u off-spinner ba la mihkhmat ïa ka Delhi Dare Devils haka IPL.
Haba phai pat sha ka kynhun ïalehkai ka jylla, ha kane ka kynti kaba mynta ka don lang ha ka thup ïa uwei pat u rang ïalehkai ba la paw bha bad ba la mihkhmat ïa ka Assam haduh snem 2008 bad une u dei u Mark Ingty.
Ka rekod ïalehkai u Mark bad ka Assam ka long ba u la ïoh ban mihkhmat 14 sien ha ki lympung bah ïalehkai (first class) bad hynñiew tylli kwei pat (List-A Match).
Pynban ka jingïalehkai kaban sah nam ha ka jingim ka jong u Mark, ka dei ka jingïoh ka jong u ban khur ïa u wiket u kapten barim ka kynhun ïalehkai ka India ba la mihkhmat ïa ka Bengal u Saurav Ganguly, kaba dei ha kane ka jingïakhun ba u Mark ha ka por ba u la bol u la ïoh ban kur 3 wiket na ka bynta 28 ron.
Ka lympung ïalehkai Vijay Hazare ka dei kaba pynïalehkai ïa ka haka dur jong ka one day kaba mynta ka kynti la buh ban long hapoh ka jylla Gujarat bad ka Meghalaya la pynïakap ïa ka ha ka thup ki kynhun ïalehkai ba dang hap hapoh ka NADP kum ka Arunachal Pradesh, Bihar, Manipur, Mizoram, Nagaland, Pudu-cherry, Sikkim bad Uttarakhand.