Press "Enter" to skip to content

Buhthong ka WHO-SEA ban pynduhjait ïa u ñiangpyrsit bad ñiangkhar hapoh u 2020

Naduh u Risaw yn sdang ai injek ha Jylla
Shillong, Nailur 16: Ka World Health Organisation -South East Asia Region ba kynthup ïa ka Ri India bad 10 tylli ki Ri ka dew bah Asia, kila buhthong ban pynduhjait noh ïa u khniang jingpang ñiangpyrsit bad ñiangkhar (Measles and Rubella) hapoh u snem 2020 na kine ki Ri.
Haba phaikhmat sha kane ka bynta, ka Ministry of Health & Family Welfare kala shim ïa ka sienjam ban pynlong da ka jingai injek dawai ban rat dyngkhong ïa u khniang jingpang ñiangpyrsit bad ñiangkhar ne ka Measles- Rubella Vaccination Campaign, sha ki Khunlung Khynnah kiba hapdeng 9 bnai haduh 15 snem ka rta. Ka thong jong kane ka Campaign ka long ban ai injek haduh 41 klur ngut ki Khynnah hapoh ka Ri.
Shibynta na kane ka jingbuhthong, ka National Health Mission (NHM), Meghalaya, kala pyntip ba kan pynlong ïa ka Workshop na ka bynta ki lad pathai khubor ban pynsngewthuh janai halor ka Measles-Rubella Campaign, ka ban long ha ka 17 tarik Nailur ha Asian Confluence, Laitumkhrah, naduh ka por 9 baje mynstep. Ka NHM kala pynlong ïa kane ka Workshop ryngkat ka Tnad ka Koit ka Khiah bad ka UNICEF.
Kat kum ka kyrwoh bala phah da u Director of Health Service (MCH& FW) Cum Joint Mission Director NHM, Meghalaya, la ong ba a Measles-Rubella Campaign ka dei ka jing pyrshang jong ki Ri ka pyrthei ban khate ïa ka jingngat ki khynnah ha kine ki Khniang bad ban khate ruh ïa ka jingïap hapoh ka Ri. La ong ba ka jingai injek dawai ñiangpyrsit ka iarap shibun ha ka ban tehlakam ïa ka jingïap ki Khynnah kiba hapoh ka 5 snem.
U DHS u pyntp ruh ba baroh ki khynnah ba don hadpeng 9 bnai bad hapoh 15 snem kin ïoh ïa ka dawai injek Measles-Rubella ba shisien ai ha kane ka campaign bad kane ka jingai injek kan long shibynta jong ka jingai injek ka ban bujli noh ïa ka jinginjek dawai ñiangpyrsit kaba ju ai sha ki Khynnah ba don hapdeng 9-12 bnai bad hapdeng 16-24 bnai. La ong ba kito ki Khynnah kiba la ïoh ïa kane ka injek, ka jingai biang ïa ka injek kan nang iarap kham bha shuh shuh ïa ki.
Kat kum ka jongong u DHS, haduh 13 lak ngut ki Khynnah ha Meghalaya kin ïoh ïa kane ka injek Measles-Rubella ka ban sa sdang nadh ka 1 tarik u Risaw 2018.
Haba pynpaw ba ka jingai jinghikai ban pyn shemphang ïa ki lad pathai khubor ka long kaba kongsan eh ban kynjoh sha ka thong, u DHS ula ong ba dei kane bala pynlong ïa ka workshop ba shiteng sngr namar ki lad pathai khubor ki don ïa ka bynta kaba khraw bha ban tehlakam ïa ki khana khlieng tyngab, ki khubor lamler bad ban ai ïa ki jingtip kiba shisha sha u paidbah.