Press "Enter" to skip to content

Rai u Dr D.D Lapang ban nym kynran dien na ka rai mih na ka Congress

Shillong, Nailur 16 : U Myntri Rangbah ba rim jong ka jylla uba la bat haduh san sien ïa kane ka shuki u Dr Donwa Dethwelson Lapang u la rai ban nym kynran dien shuh na ka rai jongu ban iehnoh ïa ka Congress wat hapdeng ki jingpyrshang jong ki nongïalam ka party ban ïakren bad kyrpad ïa u ban weng noh ia ka shithi kaba u la phah sha u Rahul Gandhi.
La ïoh jingtip ba hynnin ka sngi u Rahul u la phah ïa u Myntri Rangbah ba rim u Dr Mukul Sangma ban leit ïa kynduh bad ïakren bad u Dr Lapang uba dang don ha nongbah Delhi na ka bynta ban weng noh ïa ka shithi kaba u la phah sha u Rahul ban mih noh na ka Congress hynrei u Dr Lapang u ïeng beit ha ka nongrim ba un nym kynran dien ne weng ïa ka shithi jongu. Kumta kane ka jingpyrshang jong u Dr Mukul ka la pulom noh hynnin ka sngi.
Nalor kane la ïoh jingtip ba u Rahul Gandhi u la phah khubor ba u kwah ban ïa kynduh ïa u Dr Lapang hynrei halor katei ruh u la kyntait ban ïa kynduh. Ym tang katta na ka ophis jong u Rahul Gandhi ki la pyrshang ban phone sha u Dr Lapang hynrei ka jubab kaba ki ioh ka long beit ba ka phone ka “ switched off”.
Haba iakren bad u Dr Lapang lyngba ka phone bad kylli hato un pdiang ïa ka jingtyrwa ki nongïalam ka Congress ba un weng noh ïa ka shithi jongu, u Dr D.D Lapang u la jubab “Nga la ïehnoh ïa ka party bad ngam don kano kano ka jingthmu ba ngan pynkylla ïa ka rai jong nga”.
Kumba ka paw ha ka shithi ba u la phah sha u Rahul Gandhi ka daw ba u la mih noh na ka Congress ka dei namar ka polisi treikam jong u Rahul hadien ba u shimti kum u President da kaba u leh klet bad leh bym suidñiew shuh ïa ki nongïalam ne ki dkhot kiba la rim bha ha ka Congress.
“ Ha ka jingsngew jongnga, ka mut ba ka party kam sngewdonkam shuh ïa ki jingshakri bad jingai jingmut na ki nongïalam ba rim. Katba ka jingthrang ban trei bad shakri ïa ki paidbah ka dang iai rhem beit hapoh jong nga bad kane ka jingkhang lad ka la pynlong ïa nga ba ngan nym kwah shuh ban don ha ka party” pynpaw u Dr Lapang ha ka shithi sha u Rahul.