Press "Enter" to skip to content

Ngan ïaineh ha ka Congress, ngam lah ban haram ïa u Dr. Lapang: Mayral Born

Nongpoh, Nailur 19: U Bah Mayral Born Syiem, MLA ka Nongpoh bad uba dei ruh u MLA uba la jop na ka Congress ha kane ka election ba dang shu dep shen na Nongpoh Constituency, haba ïa kren bad ki nongthoh khubor ban pynshai halor ka jingiehnoh kam u Dr. D.D Lapang na ka Congress, u la ong ba um ym don ktien pat da kumwei ban kren, namar na ka liang jong u kum u MLA ryngkat ki nongïalam ka Block Committee ki la kyrpad ïa u Dr. D.D Lapang ban wan phai biang sha ka party, hynrei ka jingkyrpad jong ka party kam shem la seisoh namar na ka liang u Dr. D.D Lapang u la kren shai ba um kwah shuh ban don bad ka party Congress.
U la kren ruh ban pynshai halor ka jingiehnoh kam u Dr. D.D Lapang sha ki Nongthoh khubor, ka dei hadien ba hynnin ka sngi na ka liang ki nongialam ba hakhmat ka Nongpoh Block Congress Committee ki la ïa shong pyrkhat shuwa bad ki la shim ruh kawei ka rai ban pynshai paidbah halor kane ka jingiehnoh kam noh jong u Dr. D.D Lapang na ka Congress.
U la ïathuh ruh ba wat ma u kum u MLA uba u Dr. D.D Lapang u la ai ka jingkyrkhu kyrdoh ban mih bujli ha ka jaka jong u kaba u la jop suk ha ka election, um don jingtip satia halor kane ka jingthmu jong u Dr. D.D Lapang ban iehnoh kam noh na ka Congress bad kane ka jingshim rai ban iehnoh na ka Congress ka la pynlyngngoh ym tang ïa u uba ju don syndah bad u Dr. D.D Lapang, hynrei wat ïa baroh ki nongialam ka Block kiba ym don jingtip satia.
U la pynshai ruh da kaba ong, ba wat lada u Dr. D.D Lapang un mih noh na ka Congress bad ma u pat bad ki paidbah kiba la pynjop ïa ka Congress na Nongpoh kin dang don ha ka party bad ka dei ruh ka kamram jong u ban dang pynkhlaiñ ïa ka party wat lada u Dr. D.D Lapang um don shuh ha ka party kumba ki paidbah ki la pynkup bor ïa u na ka Congress party.
“Ngam don daw ei ei ban kren pyrshah ïa u Dr. D.D Lapang wat la ula mih noh na ka Congress bad kum u briew uba la ioh ka jingkyrkhu bad ka jinghikai ha ka liang ka kam sain hima sima ngan ïai burom ïa u Dr. D.D Lapang wat haduh ki sngi jingiap jong u bad ngan burom ruh ïa u kum u nonghikai ba khraw jongnga” ong u Bah Mayral Born Syiem.
U la pynshai ruh da kaba ong ba ngi hap ban burom ïa u Dr. D.D Lapang kum u nongïalam ka Ri Bhoi, kaba dei halor ki kam bad u synñiang u bynhei ba u la noh synñiang na ka bynta ki paidbah ka Ri Bhoi bad dei hapoh ka jingïalam jong u ba ka Ri Bhoi ka la ioh la ka jong ka District bad kynthup ruh lyngba ka Ri Bhoi Dorbar ula iakhun bad ïalam ban pynioh ïa ka RiBhoi Sub Division bad ruh wat ka Administrative Unit bad nai ia kren bad kiwei kiwei ki kam pynroi kiba u la noh synniang na ka bynta ki paidbah ka Ri Bhoi District, u la ong.
U la ong ruh ba wat lada ngi lah ban ïapher ha ka kam kaba ngi trei ha kam sain hima sima ba u Dr. Lapang ula mih na ka Congress, hynrei ngan nym lah ban klet ïa u Dr. Lapang bad ïa ki jingleh bha jong u kiba u la ïalam lynti haduh ba ngan da shah jied ban long kum u nongmihkhmat paidbah.
Haba la kylli pat da ki nongthoh khubor la kin don kiwei ki nongïalam ki ban mih noh na ka Congress ban bud ïa u Dr. D.D Lapang bad ruh ba ka don jingktah neem ïa ka party Congress ha Ri Bhoi halor ka jingmih noh u Dr. D.D Lapang khamtam ha kane ka election MDC bad MP, u Bah Mayral Born Syiem u la pynshai ba kumba long haduh mynta ka party Congress ka dang ia tylli hapoh ka jingïalam jong u kum u MLA bad ban pynkhlain pat ïa ka Party ka dei kamram jong jong u kum u MLA bad ruh uba la bynshet hi ïa ka lyngkor nongïalam da u Dr. D.D Lapang ban pynkhlain ia ka party wat lada u Dr. D.D Lapang um don shuh ha ka paty Congress, u la bynrap.
2 sngi lynter rai ban pep skul ki