Press "Enter" to skip to content

Pynshai ka DM&HO halor ka jingai tika

Mawkyrwat, Nailur 21: Ka District Medical and Health Officer (DM&HO), South West Khasi Hills District myn ha ka sngi thohdieng jong ka taïew ka la ïoh ban pynlong ïa ka program ai jinghikai ha kaba ïadei bad ka jingai ïa tika Measles-Rubella hapoh Mawkyrwat ha kaba ka kong I. Laloo, IAS, Deputy Commissioner jong ka South West Khasi Hills District ka la long ka kongsan.
Ka kong I. Laloo, DC SWKHD ha ka jingkren jong ka ha kane ka sngi ka ong ba kane ka jingaitika kam dei ban ngin jied tang katto katne hynrei ka dei ba baroh ki khynnah ba hapoh ka 15 snem kin hap ban ïoh. “Lada ngim lah ban pynïoh tika ïa baroh ki khynnah kata ka jinglong shngaiñ kam don namar ba lada tang iwei i khlem ïoh ïa kane ka tika kan saphriang biang kylleng kylleng”, ong ka kong Laloo.
Kane ka program ha kane ka sngi kan dei na ka bynta ka bha ka miat jong ngi hi bad ka kyntu ruh na ka bynta baroh ba kin rah ïa kane ka jingtip ha kane ka sngi khnang ba baroh kin ïoh ban phah ai tika na ka bynta ka jingbha ka dong ka thaiñ. Ka la ban ruh ïa ki Myntri shnong bad kiwei kiwei halor ki hamsaïa ba ki kyntait noh ban ai ïa une u tika ba kim dei ban shu sngap ïa ki khubor hamsaïa namar ka sorkar kam ju leh ïa kino kino kiba dei ban pynthut ïa ka jinglong jingman jong ki paidbah. “Ngin nym shah ïa ka jingartatien jong ngi kan treikam ha ka jingmut jingpyrkhat jong ngi”.
Nga kyrmen ba phin shim ba kane ka dei ka jingdonkam ba kyrpang jongphi bad da kaba werlang ruh ïa kiwei ba kim dei ban tieng na ka bynta kane ka jingaitika. Ha ka juh ka por ka la ai ruh ka jingkyntu na ka bynta baroh ba kin ïatreilang bad ai mynsiem ruh na ka bynta ki nongtrei ha ka Health ba kin nym duh mynsiem hynrei kin ïaid shaphrang ïa kane ka jingaitika.
U Dr. P.B. Kharduit haba ai jingkren u la ïathuh shaphang kane ka jingaitika da kaba ong ba yn ai ei ha kane ka campaign. “Ki khyllung kiba naduh 9 bnai haduh 15 snem karta ki dei ban ïoh ïa kane ka tika khnang ba kin lait na ki jingpang Measles-Rubella kiba long ki jingpang kiba ma bad kiba kloi bha ban ktah ïa ki khynnah ha kine ki sngi bad ong ruh ba ki khyllung kin dei ban ïoh ïa une u tika 100% khnang ba kin lait na ki jingma” la bynrap shuh shuh u Dr. Kharduit.
La pynïaid ïa ka jingïalang da u Dr. F.R. Lartang, DM&HO, South West Khasi Hills District la ïoh jingkren pdiang na u Dr. P. Lyngdoh, M&HO, Mawthawpdah PHC, na u Dr. P.B. Kharduit M&HO, Rangthong PHC, kong I. Laloo, DC South West Khasi Hills District, bad ka jingkren khublei na u Dr. P. Warjri, M&HO, Ranikor CHC.
Ban pynsngewthuh shuh shuh ha kaba ïadei bad kane ka Measles-Rubella na ka liang ka DC, South West Khasi Hills District ka la buh ruh ka jingïakren bad ki lad pathai khubor ha kamram jong ka, ha kaba ka la ïathuh na ka liang ka DC ka kwah ban pyntip ïa ki paidbah ba ka Measles-Rubella Campaign kata ban sdang ban ai ïa kane ka tika kan sdang naduh 24 tarik Nailur, 2018 kaban sa ai ha ki skul, ki aganwadi centre, ki PHC, CHC bad kiwei kiwei. Shuh shuh ka la ong ruh ba kane ka campaign ka long ban rad dyngkhong ïa jingpang Measles-Rubella ha ki kyllung khynnah kiba hapdeng ka 9 bnai haduh 15 snem karta. Ka la ban ruh ba ïa kito kiba ladep ban ai tika MRR kin hap ban ai biang ïa kane ka tika Measles-Rubella bad bynrap ruh ba lada ki khynnah ki don ha ki jingpang lada dang malu mala ïa kane ka tika dei ban ai hynrei lada ka jingpang ka jur yn nym ai bad na ka lianng jong ki doctor ruh ki la ong ba hadien ba lla dep ban ai tika lada ki ïoh jingpang ki doktor kin sa shim ïa ka bynta ban sumar ïa ki.
Shuh shuh ka la ïathuh ruh ba lada don kito ki shnong ki ban kyntait ïa kane na ka liang ka DC ka ong ba la dep buh lypa ki nongtrei ki ban pynshai ha kaba ïadei bad kane bad ong ruh ba na ka lliang ki bor district ki la dep ban leit ïakynduh ïa ki trai skul, ki balang bad ïa kiwei kiwei khnang ba kan ym don ka jingartatien ban ai ïa une u tika. Ka la buh ruh ka jingkyrpad na ka bynta ki paidbah ba kin ïatreilang khlem kano kano ka jingsheptiieng bad ban nym shu ngeit bieit ïa ki hamsaïa ba shu pynsmiej khnang ban lah ban raddyngkhong ïa kine ki jait jingpang.
Ha kane ka sngi na ka liang ka office jong u District Medical & Health Officer, Mawkyrwat ka la ïoh ban pynlong ïa ka jingïa-ïaid paidbah kaba la tip kum ka Measles Rubella Vaccination Campaign 2018 ïa kaba la sdang na phyllaw jong ka office DM&HO bad pynkut pat ha phyllaw jong ka DC’s Office, Laitlawsang ha kaba la wan shimbynta naduh ki Officer Sorkar, ki ANM, ki ASHA, ki Anganwadi, ki nonghikai lem bad ki khynnah skul kiba la pynsngew ha ki paidbah ïa ka jingdonkam jong u Measles Rubella Vaccination ban ai naduh ki khunlung kiba la dap 9 bnai haduh 15 snem karta.