Press "Enter" to skip to content

Leit ai dorkhas ka HYC South West ha khmat u Myntri ka Koit ka Khiah

Mawkyrwat, Nailur 22: Ka Hynñiewtrep Youth Council (HYC) jong ka South West Khasi Hills District, Mawkyrwat ha ka sngi palei jong ka taïew ka la ïoh ban ïakynduh markhmat ïa u bah A.L. Hek, Myntri ba dei peit ïa ka tnad ka koit ka khiah ka Jylla Meghalaya ha ryngkat ka dorkhas.
Ka Seng HYC hapoh ka jingïalam jong u bah Arbok Kharjahrin, President HYC, SWKH lem bad u bah Bantei Wanniang, Vice President HYC SWKH ha ka jingleit ban ïa kynduh ïa u myntri ka koit ka khiah jong ka jylla ki la pynsngew ha khmat jong u ïa ki jingeh ba ki paidbah ki ïa kynduh namar ka jingsah teng jong ka jingtei ïa ka jaka sumar kaba don 100 jingthiah hapoh South West Khasi District bad ki la pynsngew ruh ha u ïa ki jingdonkam jong kane ka jaka sumar. Lah ban kdew hangne ba kane ka 100 jingthiah la dep ban ïoh naduh ki por kiba la leit hynrei kat haduh kine ki sngi ym shym pat lah ban pyndep.
Ha kawei pat ka bynta na ka liang ka HYC ha kane ka jingleit ban ïa kynduh ïa u Myntri ka koit ka khiah ka Jylla ki la buh ruh ka jingkyrpad ba un sngewbha ban ïarap lem ban buh ne pynïoh noh kawei ka Auxiliary Nursing Midwife (ANM) Centre kaba dei ka jaka pule nongsumar nongpang (School of Nursing) hapoh Mawkyrwat ka ban long ka jingmyntoi na ka bynta ki samla ka dong ka thaiñ kiba kwah pule ha kane ka bynta. Namarkatkum ka jingtip ba thikna jong ka seng ba ïa kane ka centre la dep ban tyrwa naduh kham mynshuwa hapoh Mawkyrwat hynrei na kaei ka daw kane ka kam ka la shu jah noh khlem lap ksai shuh haduh mynta.
Na ka liang ki dkhot jong ka Seng HYC haba ïoh ban ïa kren bad ki lad pathai khubor ki la ïathuh ba na ka liang jong u Myntri ba dei peit ïa ka koit ka khiah ula ïathuh ba kane ka kam ka la ïaid shakhmat bad ula kular ruh ba un sa shim khia shuh shuh ïa kane ka kam da kaba ula ong ruh ba kane ka kam kan dei ka mat ba hakhmat eh ban pynsted ba kan long noh ka jaka sumar kaba paka.
“Ha kaba ïadei bad ka jingslem ban pyndep ïa katei ka jaka sumar, ka HYC ka la ïoh ban ïakynduh ruh ïa u Joint Director ka DHS bad na ka liang jong u u la ïathuh ba ka Department ka la pynkhreh lut bad ka la dep phah ïa ka jingmang shapoh Secretariat bad ap sa tang ïa ka approval na ka liang ka Sorkar Jylla”, la bynra u Bantei. Shuh shuh ha kaba ïadei bad ki doktor lem bad ki nongtrei na ka liang u Director ula kular ba un sa mang noh ïa baroh ki post kiba katkum ka jingdonkam jong jaka sumar kaba don 100 jingthiah hapoh South West Khasi Hills Distict.