Press "Enter" to skip to content

La pynkit ïa ka metiap jong ka samla pule doktor ba khlad kyndit ha Delhi

Shillong, Nailur 24 : Ia ka metiap jongka samla Tracy Kharkongor kaba la khlad kyndit ha ka miet Sngi U Blei ha Delhi hadien ba la wai ka Conference jong ki doktor la pynkit noh sha nongbah Shillong, ïathuh u bah Daniel Stone Lyngdoh uba dei u Delhi Police North East Representative (DPNER). Ka Dr Tracy ka dei kaba dang pule PhD ha Bangalore bad ka trei ruh ha ka Dr Patil Facility and Endoscopy Clinic Bangalore. Ka la mih na Bangalore ha ka 21 tarik mynta u bnai ban leit ïashim bynta ha a Conference jong ki Doktor kiba don 200 ngut ei ei ha nongbah Delhi kaba la sdang naduh ka 22 tarik bad kut hynnin ka Sngi U Blei 23 tarik.
Ha ka Sngi U Blei hadien ba la kut ka Conference ha ka por 5.30 ei ei janmiet ma ka bad kawei ka paralok ka Dr Madhuri Patel ki la leit phai sha Hotel Lalit ha Delhi ban ïa leit shim ïa ki tiar ban ïaleit noh sha Airport (Kad Lingsuiñ) namar ka liengsuiñ jong ki kan mih ha ka por 8.30 ei ei mymiet na Delhi sha Bangalore.
Kyndit kyndit shwa ban mih artat na hotel ka la pan um na ka paralok ka Dr Madhuri bad ïathuh artat ha ka paralok la jong ba ka sngew ktha ne baiong khlieh. Mar kumta hi ka la kyllon ha madan bad ka khlem tip briew shuh. Hadien kane la pynkit ïa ka mar mar sha RML Government Hospital ha nongbah Delhi hynrei haba la poi ha Hospital ki doktor ki pynbna ba ka la dep khlad lypa.
Mar mar ka Dr Madhuri ka la pyntip sha ki para kiba ïasah lang bad ka Dr Tracy ha Bangalore kiba dang pule shathie bad ki pat ki la pyntip sha ki kmie ki kpa kiba don sha Shillong namar hangne ha Shillong ki sah ha Pynthorumkhrah, Golflink. Ka para kaba mih na Bangalore ka la poi sha Delhi ha ka por 11.30 myn miet katba ka kmie, u kni, lai ngut ki hymmen bad ki para ki la ïapoi na Shillong sha Delhi hynne por 12.15 baje ei ei.
Ki pulit jongka Barakhamba Police Station ki la ïarap ban buh jingthoh jingtar bad kumjuh ruh u DPNER ruh u la pyntip sha ka North East Delhi Police jongka PTS Malvianagar. Na ka liang ki PTS Malvianagar bad u DPNER ki la phah ia u SI Rajinder Singh ban ai ka jingiarap kaba kyrkieh.
La pyndep ïa ka post mortem ha ka step 24 tarik ha Forensic Department jongka RML Hospital bad la ïoh ban pynkit ïa ka met mynta hi ka sngi na Delhi sha nongbah Shillong.