Press "Enter" to skip to content

2.40 lak ka tulop shibnai synniang u Bah AL Hek sha ki lanot ka Jylla Kerela

Shillong, Nailur, 29: U Bah AL Hek, Myntri ka tnat Information and Public Relations (IP&R) ka Sorkar Jylla mynta ka sngi saitjaiñ u la noh synniang shibnai ka tulop ba u ïoh sha ka Kerala Chief Minister’s Flood Relief Fund (KCMFRF) na ka bynta ban ïarap ïa ki lanot kiba la shah ktah na ka jingshlei um ba dang shen ha ka Jylla Kerela.
U Bah AL Hek u la aiti ïa ka pisa da ka cheque kaba T.2,04,000 lak sha u Myntri Rangbah ka Jylla Kerala u Pinarayi Vijayan ha ophis treikam ha Secretariat ha Thiruvananthapuram.
Ïa une u Myntri ka Sorkar Meghalalaya la pdiang burom da u Myntri Rangbah ka Jylla Kerela uba la pynpaw ruh ïa ka jingsngewnguh shikatdei eh ïa u Bah AL Hek. U la pynpaw ruh ïa ka jingkyrmen ba une u synniang ba u la noh kan nang pynsyaid pynrhem bad kan nang wanrah shuh shuh ïa ka jingïadei kaba jan na ki paidbah ka Jylla Kerela, ba ju tip ruh kum ka “God’s own Country” bad ki paidbah nongshnong ka Jylla Meghalaya ba ju tip kum ka ‘Abode of the Clouds.’
Na ka liang u Bah Hek u la ong, ‘nga sngewkmen shikatdei eh ban mihkhmat ïa ki paidbah ka Jylla Meghalaya,” da kaba aiti ïa kane ka pisa kum u synniang jingïarap sha ki paidbah nongshong shnong ka Jylla Kerela.
U la ïathuh, ba ka Sorkar Meghalaya shen kan sa aiti ïa ka pisa ba la noh synniang da ki paidbah sha ka Meghalaya Chief Minister’s Flood Relief Fund (MCMFRF) ïa kaba yn sa aiti ha u Myntri Rangbah ka Jylla Kerela.
“Nga sngewkmen haduh katta katta ban wan iuhkjat ha ka jylla ba la khlad ïa u hymmen rangbah jong ngi, u Shri M. M. Jacob (bam kwar ha dwar u Blei) uba la long u Lat ba la shakri la 12 snem kynthih ïa ki paidbah nongshong shnong ka Jylla Meghalaya,” la ong u Bah Hek. Ïa u Bah AL Hek la synran lang da u Bah Christopher Rani, CEO ka CR Projects, ka kompani ba don ïa ka shlem treikam ha Nongbah Shillong.