Press "Enter" to skip to content

Da ka ambulance kyrpang ïa kiba sah ha Shillong ai u MLA ka Mawsynram

Shillong, Nailur 29 : Ban pynsuk ïa ki paidbah ka Mawsynram constituency kiba sah ha Shillong haba don kiba pang ba shitom ne kino kino ki jingjia ba sngewsih, u MLA ka Mawsynram, Bah HM Shangpliang ha ka sngi Saitjaiñ u la pyllait paidbah ïa ka ambulance kyrpang na ka bynta ka jingdonkam jong ki.
Ïa katei ka kali kit nongpang, u MLA u la aiti ha ka Mawsynram Constituency Welfare Organisation Shillong (MCWOS) kaba dei ka seng jong ki nong Mawsynram constituency kiba sah ha Shillong ba kan pynïaid haba don ki nongpang ne kiba khlad ban kit na Shillong sha ki shnong kiba hap ha Mawsynram constituency.
Katei ka sienjam ba u MLA u shim kadei namar haba don ki paidbah ka Mawsynram constituency kiiba shitom jur ki ju wan phah sumar ha ki hospital bapher bapher jong ka nongbah Shillong hynrei haba don ba khlad jynjar ban wad kali kit metïap kane ka la buh jingeh ïa kiba haiing hasem ban kit sha shnong.
Na ka liang u MLA haba kren shwa ban pyllait paidbah ïa katei ka kali u ong ruh ba ha kine ki hynriew bnai ba u jop u la sakhi bad kynduh hi markhmat ïa ka jingeh kiba bun bha ba ki paidbah ka thaiñ ki kynduh haba don kiba pang ba shitom bad khamtam eh haba ïadei bad ka jingeh ban ïoh ambulance. U ong ruh ba katei ka kali kan ïarap ban weng ïa ka jingeh jong ki paidbah ka constituency khamtam haba donki jingjia ba sngewsih.
Shuh shuh u ong ruh ba ka jingaiti ïa ka ambulance sha ka seng MCWOS ka dei namar ba ka Shillong ka dei ka jaka ba ki paidbah ka constituency ki wan shah sumar haba pang ne shitom bad ba kan pynïaid ïa ki jingdonkam baroh.
U Bah HM Shangpliang ha kane ka sngi u la pyllait paidbah ruh ia ka kot shaphang ka shnong Mawsynram ba la thoh da u bah Dras Marbañiang.