Press "Enter" to skip to content

La seng nongrim ïa ka party NPP ha Mizoram ban ïakhun ïa ka election MLA

Shillong, Nailur 29 : Da ka thong ban wanrah ïa ka jingïatylli bad ïalong kawei jong kane ka thaiñ shatei lam mihngi ka ri India, u National President jong ka National People’s Party (NPP) uba long ruh u myntri rangbah ka jylla u Conrad K Sangma u la seng nongrim ïa ka NPP mynta ka sngi ha jylla Mizoram.Ka thong jong kane ka jingseng ïa ka NPP ha katei ka jylla ka long ban pynkhreh ban ïakhun ïa ka election MLA ka ban sa long shen ha katei ka jylla.
Kiba la ïadon lang ha kane ka sngi ba seng nongrim ïa kane ka party ki long u Myntri Kam pohiing ka jylla u James K Sangma, u Deputy Speaker u Timothy D Shira, u myntri ka tnad ïalehkai sport jongka Manipur u Letpao Haokip, u nongai buit jong u myntri rangbah u Thomas A Sangma bad u Chief Whip jongka sorkar u Marcuise Marak.
Ka NPP ka la trei shitom mynta la shisnem ei ei ban ïoh suh thied ha Mizoram bad dei tad mynta ka sngi ba la seng ïa kane ka party. Ha ka jingplie ïaka Party ha Mizoram la buh ruh ïa ki kyntien ba kyrpang kiba long “ Kawei ka sur kawei ka North East”.
U Myntri Rangbah haba kren ha ka jingialang u la ong ka NPP ka don ka thong ban tei pat ïa ka Mizoram bad kumjuh ruh ban pynneh pynsah ïa ka kolshor, jingithuh ha khmat ki bor ba halor.
U la ong ïa une u symbai jong kane ka party ban ïar ha kane ka thaiñ shatei lam mihngi la bet da u kpa jong u u (L) P.A Sangma bad mynta ngi ïai bud ïa ki dienjat jongu.U la buh ïa ka thong ban ïada na ka bynta ki paid riewlum kane ka thaiñ, ïa ki Khristan bad ia kiwei kiwei ki rit paid. Ki dei lyngba kine ki thong kaba la pynlong ïa ka NPP ban nang khlaiñ khnang ba kan lah ban pynurlong ïa ka jingphoh sniew jong ki paidbah.
U la pynpaw ruh ka jingkyrmen skhem baka NPP kan leh kam phylla ha Mizoram kaba dei ka jylla kaba bun ki paid Khristan. Ka India ka dei ka ri kaba don palat 100 million ki paid riewlum hynrei ym da don ba ithuh ïa ki ha ka synshar khadar. Dei tad hadien 50 snem ba ka ri India ka la ïoh ïa ka jinglaitluid ba la pynrung myntri ha ka sorkar pdeng ïa uwei u riewlum. U Conrad u la ong ba um kynnoh ïano ïano hynrei u kren halor ka jingshisha namar kat haduh mynta ruh kane ka thaiñ kam pat da ïoh ka bhah kaba biang ha ka synshar ka khadar. Ka NPP ka dei ka party kaba kwah ban wanrah ïa ka jingiatylli ha kane ka thaiñ baroh kawei hapoh kawei ka shatri bad kawei ka rynsan.
U la ong ruh ba ka NPP ka trei da kata ka thong ban pynpiar ïa ka party ban wanrah ia ka jingiatylli ha kane ka thaiñ. “ Nga kyrmen skhem ba ki paidbah jong ka Mizoram kin pdiang ïa ka NPP bad ailad ba kan trei ha kine ki thong jongka bad ai ruh ba kan long ka party ka ban mih bujli bad ïalam ïa ka Mizoram sha ka lawei ba thymmai” ong u Conrad.
“ Ka dei tang ka NPP kaba ju kren bad ïeng pyrshah ïa kino kino ki jingshah thombor jong ki Khristan, ki riewlum rit paid bad kiwei kiwei ki riew rit paid ha ka ri. Ngin ïaid ïeng ïaleh na ka bynta ki riewlum bad ki hok jongki” ong biang u Conrad. Wat la ym pat pynbna katno seat kan ïakhun ia ka election hynrei la shu pynpaw ba kan ïaleh katba lah ban pyniakhun na baroh ki constituency.U National General Secretary jongka NPP uba la thung ban peit ïa ka Mizoram u Dr Lalrintlunga Jahau uba la trei shitom ban seng ïa ka party ha Mizoram un long u khlieh ban peit bad pynkhlaiñ ïa ka party. U President ba rim jongka Young Mizo Association (YMA) u Lianzuala u la shah jied kum u Convenor jongka Party.