Press "Enter" to skip to content

Pynmih hukum u SP (Traffic) ïa ka rukom pynïaid kali ha Nongpoh

Nongpoh, Nailur, 29: Namar ka jingsahkut jong ki kali bad ka jingkhap ngiah jong ka surok Service Lane ba hap ha ka surok National Highway-6 ha ka thaiñ Nongpoh, u heh pulit ka Ri-Bhoi District u la pynmih da ka hukum ban pynbeit ryntih ïa ka rukom ïaid ki kali ha baroh arliang ka surok Service Lane na ka bynta ban pynduna ïa ka jingkhapngiah bad jingdheng kali kaba yn sa sdang naduh ka 1 tarik Risaw 2018.
Kane ka jingthmu ban pynbeit ïa ka rukom ïaid kali thymmai ka dei tang naka bynta ka surok service lane namar ka jingdheng bad sahkut palat jong ki kali kaba buh ïaki paidbah ba leit ba wan hapdeng ka jingeh.
Haba batai halor katei ka hukum bad ka jingthmu bad ka rukom pynïaid thymmai ïaki kali, u Bah D Khyriem DSP ka Ri-Bhoi bad dei peit ïa ka tnad Traffic, u la ong ba katei ka jingpynïaid thymmai ïa ki kali kan sdang naduh ka 1 tarik u bnai ban wan ha baroh ar liang ka surok service lane ha kaba yn sdang naduh lad Bethany Hospital, Pahamsyiem ter ter shaduh ka lad jong ka ophis ka Deputy Commissioner ha Umyngkdait la pynbeit ba kino kino ki kali kiba kiew na Guwahati sha Shillong, ka Surok Service Lane sha ka liang ka diang kan long beit thik tang na ka bynta ki kali kiba kiew sha Shillong (One Way) bad kino kino ki kali ki ban hiar na Shillong sha Guwahati, ka surok Service Lane sha ka liang ka diang kan long beit thik na ka bynta kito ki kali ki ban hiar sha Guwahati.
U la ong ruh ba ïa kane ka hukum la pynmih na ka bynta ka jingsuk ki paidbah ba leit ba wan na katei ka surok ban ym buh jingeh ïa ki paidbah namar kumba long baroh shikatta ka jingeh ka mih na ka jingdheng kali ka dei namar ka jingïaid kulmar palat jong ki kali ha ka surok service lane ha sor Nongpoh.
U Bah D Khyriem u la kyntu ïa ki paidbah kiba leit ba wan baroh naduh ki kali shimet haduh ki kali kamai ba kin bud ryntih ïa katei ka rukom pynïaid kali thymmai, khnang ba ki kali kin ym sahkut shuh bad ba ki paidbah hi kin suk ha ka leit ka wan.