Press "Enter" to skip to content

Ym lah pyndep ïa ka MPA ba duh ka jylla 25 klur na ka Sorkar Pdeng

Shillong, Nailur 28 : Ym shym la lah ban pyndep ha ka por ïa ka Meghalaya Police Academy na ka daw ba ka sorkar jylla ka la duh noh ïa ka Grant ba 25 klur tyngka na ka sorkar pdeng.
ïa kane la pynpaw ha ka kaiphod Comptroller and Auditor Geneal (CAG) jong ka ri India ha ka Social Economic, General and Economic (PSU) Sector haba kut jongu snem 2017 kaba la wanrah hapoh ka ïing dorbar thawaiñ jongka jylla dang ha kine ki khyndiat sngi.
Ka jingshisha ka long wat hadien ba la dep pynlut haduh 33.09 klur hynrei ym pat lah ban pyndep ïa kane ka project. Namar ba ym lah ban pyndep ha ka por, ka jingiarap grant ba la ai da ka XIII Finance Commission ruh ka la kut por noh bad ka jylla mynta kan hap ban pynlut hi ban pyndep ïa kane ka project namar mynta ka la duh ïa kane ka 25 klur tyngka. Ka XIII Finance Commission ha u Nohprah 2009 ka la ai ïa ka jylla 50 klur tyngka na ka bynta ban tei ïa ka Meghalaya Police Academy (MPA) ha kaba yn ngiam ban ai jinghikai haduh 450 ngut ki pulit.
Ki kyndon ba la buh ban tei ki long 35 tylli ba kynthup naduh ka madan Parade, ki jaka ïa mareh, ïa kynthih, ka stadium, ka jaka hikai siat suloi ba shabar bad hapoh ïing, ki kamra Klass, ka Forensic Science Lab, ki jaka sah bad ki ophis.
Hadien shisnem ka sorkar ka la thied 100 acre ka jaka ha Umran, Niangbyrni ban tei ïa kane ka MPA bad la aiti ïa ka project sha ka MGCCL.
Ka kaiphod jingthoh CAG ka la lap ba na ka liang ka Police Head Quarter ki la pynrit ïa ka project da kaba mang ban tei sa tang 26 tylli ki jingtei ym shuh 35 kumba la mang mynshwa. Hadien kane ka MGCCL ka la nang pynrit shuh shuh sa tang 13 jait ki jingtei bad la leh ia kane namar ïa ka jingmang pisa la pynshong nongrim kat kum ki dor ha u ssnem 2010-11 na ka bynta ki ïing bad na ka bynta ki kam bor ding pat la pynshong nongrim da ki dor 2007-08. ïa ka DPR la pyndep ha u 2013-14 bad ka dor ka la ïapher bak- ly- bak bad na kata ka daw ka MGCCL ka la khot tender ban tei sa tang 11 jait ki jingtei. ïa ka kam la ai sha ki hynriew ngut ki kontraktor da kaba la ai por ba kin pyndep hapoh u Nailur 2016 bad Lber 2017. Hynrei ïa kane ka MPA ym shym la lah ban pyndep wat ka kam la dep 40 haduh 80 % bad ka jinglut ka la kot sha ka 33.09 klur tyngka.
Ha u Lber 2016 ka sorkar ka la mang 3.61 klur tyngka na ka bynta kane ka project bad ïa ka pisa ruh la pyllait sha ka MGCCL ha u Nailur 2016. Na ka liang u AIG (Administration) u la pynpaw ka jingslem ka dei na ka daw ban slem ïoh ïa ka jaka bad ïa ka pisa la pyllait 30.61 klur sha ka MGCCL bad sa 10 klur la pan na ka sorkar naduh u snem ba la dep khnang ban ïoh pyndep noh ia ka project.