Press "Enter" to skip to content

Rai set phatok shi jingim ïa u runar ba pynïap ïa la u hymmen

Nongpoh, Nailur 30: Namar ka jingdon kti ban pynïap ïa la u Hymmen lajong, uwei na u runar ba la tip kyrteng kum u Pington Lamare (36) u la shah pynhap syndon ha ka jingpynshitom da kaba shah set phatok shi jingim (Life imprisonment) kaba dei hadien ba ka ïingbishar ka la ai ïa ka jingbishar kaba khatduh halor katei ka kam pynïap briew utei u runar.
Kum ban pynkynmaw, kane ka jingjia ka la jia naduh ka 9 tarik u Naiwieng 2001 ha ka Shnong Umkaduh ha Ri Bhoi, ha kaba utei u Pington Lamare u la nud ban pynïap wat ïala u hymmen lajong bad ban tep ïa u, hynrei dei lyngba ka jingujor ka lok jong utei u rangbah ba la shah pynïap ba utei u runar u la shah kem bad u la leit hi ban aiti ïa lade ha ki Pulit ka Nongpoh.
Haba ïa kren bad u Nongthoh khubor, ka Additional Public Prosecutor, ka Kong E. Rynjah ka la ïathuh ba na ka liang ka ïingbishar jong ka District Session Court hadien ka jingbishar bad ba la biang lut ki sakhi bad ruh ba utei u runar ruh u la phla ba u la pynïap hi ïa la u hymmen ba ka ïingbishar ha ka jingbishar kaba khatduh kata ha ka Sngi Palei ba la dep ba la pynhap syndon ïa utei u runar ha ka jingpynshitom kaba u hap ban shong phatok shi jingim halor katei ka kam pynïap briew jong u.
“La pynthikna ruh ïa utei u runar ba u la pynïap ïa la u hymmen katkum ki sakhi ba la tohkit da ki Pulit bad ba u la phla ruh ha khmat ka jingbishar ba u la don kti ban pynïap ïa la u hymmen ba la pyngngat ha kyndon aiñ 302 bad 201 IPC” la ong ka Kong Rynjah bad bynrap ruh ba utei u runar nalor ba u la shah pynhap ha ka jingpynshitom kaba shi jingim ban shah set phatok u la hap ruh ban siew ïa ka kuna kaba T. 20,000 bad ruh T. 5000 kaba dei katkum katei ka kyndon 302 bad 201 IPC, ka la bynrap.
Ka la ïathuh ruh ba lada utei u runar um lah ban siew ïa katei ka kuna katkum katei ka kyndon aiñ un dang hap ban shah set phatok shuh shuh lai snem bad 6 bnai kumba la pynpaw ha katei ka kyndon aiñ ba ka don ruh ka kuna kaba u hap ban siew sha ka lanot kaba shah ktah halor katei ka jingshah pynïap u lok jongka.
Ka Kong Rynjah ka la ïathuh ruh ba kane ka jingpynshitom ba la ngat da utei u runar ka lah ban long ba ka dei ka sien kaba nyngkong eh ha ka ïingbishar jong ka District & Session Judge ha Ri Bhoi bad ka la long ruh ka jingai mynsiem ïa ki paidbah ba kin mih shakhmat ban ïoh ïa ka jingbishar kaba hok na ka bynta ban pynduna ïa ki kam sniew ha ka imlang ka sahlang, ka la bynrap.
Shuh shuh, kum ban bynrap halor kane ka case ka aiñ kan nym map ïano ïano ruh kiba leh ïa ki kam sniew bad kumba la jia ha kane ka case une u runar uba la nud ban pynïap ïa la u hymmen u la ïoh syndon ïa ka jingpynshitom kaba shi jingim kaba dei hadien ka jingbuddien ka aiñ haduh 18 snem ba ka lanot ïa ka la ïoh ïa ka jingbishar kaba hok (Justice delivered to the victim).