Press "Enter" to skip to content

Da ka ‘kper ïing shet ja, pynshlur ka Soil ïa ka kam rep ha ki skul

Shillong: Ka tnad Soil and Water Conservation, ka la lap ïa kawei ka buit ban khring ïa ki khynnah skul ha ka kam rep kam riang ynda ki ladep ha ka jingpule jong ki bad kata ka long ban buh ïa ka kper ha phyllaw jong ka skul.
Kane ka tnad treikam, lyngba ka skhim kaba wan na ka tnad Ministry of Tribal Affairs, kala pyntreikam ïa ka skhim Rain Water Harvesting lane ka jingkynshew um lyngba na u slap bad ‘Kitchen Garden’ ne ka kper ïing shet ja.
Ïa kane ka skhim la pyntrei kam ha kiba bun tylli ki District jong ka jylla bad kumjuh ruh ha ki C&RD Block, ha kaba ka tnad Soil and Water Conservation, ka pynshna ïa ki top um da ka dewbilat bad kumjuh ruh ïa ki kper ban thung jhur ha ki skul kiba la jied lyngba ka jingïatreilang bad ka tnad pule puthi jong ka sorkar jylla.
Kawei na ki skul kiba la ka Soil and Water Conservation, ka la pyntreikam ïa kane ka skhim, kadei ka skul Mairang Vidyajyoti Inclusive School, Sangshong, Mairang, kaba dei ka skul ba nyngkong eh ban kynthup lang ïa ki khynnah kiba biang bad kiba duna ki dkhot met, ha West Khasi Hills District. Ïa kane ka skul la seng da ka KJP Synod Sepngi ha ka snem 2008.
Kum ka jingïaleh ban ai ka jingpynsngewthuh ne ka jinghikai ha kaba ïadei bad kane ka skim, ka ophis Soil and Water Conservation Division, West Khasi Hills District, ka la pynlong ïa ka Workshop dang shen ha katei ka skul, ha kaba la ai wan ai jinghikai da I Kong BH Syiem, Divisional Soil & Water Conservation Officer bad u Bah F. Syiemïong, Assistant Soil & Water Conservation Officer. Ha kane ka sngi la ïadonlang ruh ki dkhot ka Managing Committee jong ka skul, ki Nonghikai bad ki Khynnah Skul.
I Kong Syiem, i la ong ba tang na ka kyrteng, kane ka kper la sngewthuh ba kadei ka kper thung jhur, kiba ki briew ki ju pyndonkam ïa kine ki jhur ha kaba bam ja bad ka jingthung kan long beit khlem da ai dawai. I la pynpaw ruh ka jingsngewkmen ba kane ka skul, ka la don lypa ka jinghikai ïa ki khynnah ha kam rep kam riang, kynthup ïa ki khynnah kiba duna ki dkhot met. “Ka jingïohlad ki khynnah ban pyllut por ha kiba kum kine ki kper kan pynlong ïa ki ban kin ieit ïa ka rep ka riang bad kan pynpyngngad ruh ïa ka jabieng jong ki, hapdeng ka jingbunkam ha ki kot skul”, i la ong.
I la ïathuh ruh ba ïa kane ka skhim la pyntreikam khamtam ha ki skul kiba don ïa ka midday meal ne kiba ai ja sngi ïa ki khynnah skul. Ha kajuh ka por, i la kyntu ïa ki nonghikai ban ïashimkhia lang ha kaba ai jinghikai ïa ki khynnah lyngba kane ka kper, kaba don ha phyllaw jong ka skul.
U Bah Syiemïong pat u la ai jinghikai halor ka rukom kynshew um na slap ka ban long ruh ka jingïarap na ka bynta kane ka kper ha kaba ai um ïa ki jhur, nalor ba ka skul kan pyndonkam ha kiba bun ki liang.