Press "Enter" to skip to content

Pulom ka jingpan District ka Sohra, aidaw u CM ba tyrkhong pla tyngka ka Sorkar

Shillong, Risaw 01: Ka jingdawa jong ka South East Khasi Hills District Demand Forum (SEKHDDF) ban kyntiew kyrdan ïa ka Sohra Civil Sub Division sha ka District ba thymmai kala pulom bad u Myntri Rangbah ka Jylla Conrad Kongkal Sangma, ula aidaw ba ka Sorkar Jylla kan nym lah ban leh ïa kane namar ka jingtyrkhong pisa.
U Conrad K.Sangma ula pynpaw ïa ka jingeh hakhmat ki Nongkitkam ka SEKHDDF kiba la ïakynduh ïa u hynne ka janmiet ban buh ïa jingdawa lyngba ka dorkhas, hakhmat ka Sorkar Jylla.
“U Myntri Rangbah ka Jylla ula pynpaw ïa jingeh ban ai District ïa ka Sohra namar ka Sorkar Jylla ka
don hapdeng ka jing kyrduh pisa” ong u Bah Allan West Chairman ka SEKHDDF haba bynrap “Kaba sngewtynnad pat ka long ba u Myntri Rangbah ka Jylla ula pynpaw ba ka jingdawa ïa ka District jong ka Sohra ka dei kaba don nongrim”.
Haba kynthoh ïa ka jingong u Myntri Rangbah ba ka Jylla ka kyrduh pisa, u Bah Allan “Kane ka jingkren u Myntri Rangbah kam mut ba um ai ïa ka District hynrei u pynpaw ba ka dei ka jingeh ba shipor. Namar kata, ngi kyrmen ba ha kawei ka sngi ka jing khmih lynti jong ki Nong Sohra ban ïoh Disrtrict ba thymmai kan sa urlong”.
Haba pynpaw ba ka jigpan District kam dei satia kaba shu pan tang bala pan hynrei ka dei ka jingpyrkhat jong baroh ki riew rangbah ka Sohra kiba sngew bala donkam ïa ka District na ki daw bapher bapher, u Bah Allan ula ong “ Phi lah tip hi ba ka jingwan jong ka district ka wanrah ïa ka jingiajan ka jingsynshar bad ki paidbah. Ka Sohra kala iar bha bad la sngew donkam ban ïoh ïa ka jingsynshar (Administration) ka ba kham bha ha Sohra kaba lah ban wan lyngba ka jingïoh District”.
Haba kdew ba ka Sohra kala nang kiew ha kine ki khyndiat snem bala leh khamtam haba ïadei bad ka jingwan ki nongjngohjai pyrthei, u Bah Allan u ong “Ngi sngew ba ka Sohra kan sa nang iar shuh shuh nangne shakhmat bad lada ngim shimkhia ban wanrah ïa ka jingsynshar ba kham bha, lehse ki kam pynroi pynpar ki ban wan ruh kin long kiba lyngkrang (unplanned)”.
Kat kum ka jingong jong u, ka jingsynshar kaba bha ka long kaba donkam bha ïa ka Sohra ba kan nym poi sha ka jingbabe kum ba long ka Nongbah Shillong kaba shu babe beit kat shaba phai ki khmat namar ka jinglyngkrang ki kam pynroi.
Haba kdew ba ka Sohra ka dei ka jaka ka bym don ïa ka Tajmahal ne ka Great Wall of China ba khring ïa ki briew hynrei dei tang ka mariang, u Bah Allan ula ong “ Lada ngi bakla bad ym pynwandur bha (plan) lehse ngin duh noh ïa ka jingitynnad jong ka Shnong Sohra baroh kawei”.. U ong ba tang ka jingwan jong ka District kaba lah ban weng ïa kine ki jingeh baroh.
Lah ban kdewba u Dr Donkupar Roy, MLA ka Shella uba dei ruh Lamphang ka Ïingdorbar Thaw Aiñ bad Nongïalam ba ha khliehduh jong ka United Democratic Party (UDP) kaba ïasynrop ha ka Sorkar Meghalaya Democratic Alliance ba lamkhmat da ka National Peoples Party (NPP), ula pynpaw hakhmat u paidbah ka Shnong Sohra ba u Myntri Rangbah ka Jylla ula kular ban ai District thymmai ïa ka Sohra hynrei kane ka jingdawa kan sa urlong ym mynta mynta hynrei ha ki snem ban wan.
Une u Nongïalam ka SEKHDDF ula ïathuh ba na ka liang jong ki Nongmihkhmat ka Sohra bad Shella kata u Dr Donkupar Roy, Lamphang ka Ïingdorbar Thaw Aiñ bad u MLA ka Sohra Bah Gavin Mylliemngap, kila ai ka jingkyrshan ba pura ïa ka jingdawa kyntiew kyrdan noh ïa ka Sohra Civil Sub Division sha ka District.
“Ngi sngew ïoh mynsiem ba ki Nongmihkhmat kila ai ka jingkyrshan ïa ka jingdawa. Baroh arngut ki Nongmihkhmat (MLA ka Sohra bad Shella) kila pynpaw ba ka Sohra kala donkam ban ïoh ïa ka District” ong u Bah Allan haba pynpaw “Ka Forum ka sngew ba ka sur jong kine ki Nongmihkhmat ka long kaba donkam bha. Da ka jingkyrshan jong ki, ngi sngew ba kawei ka sienjam kala ïaid shakhmat”.
Haba kylli ïa kaei ka sienjam ba ka Forum kan shim ha kaban pynbor ïa ka Sorkar Jylla ba kan pynurlong ïa ka jingdawa District, u Bah Allan ula ong “Ka Forum kan buddien na ka por sha ka por ïa ka jinglong jingman ka pla tyngka jong ka Sorkar Jylla bad ynda kala biang, ngin sa wan ïakren bad ka Sorkar ba kan pynurlong”.
Haba ïadei pat bad ka jingpynpaw ïa ka jingbym sngewtynnad ban ai District ïa ka Sohra na ki kynhun ka thaiñ Pynursla, une u Nongïalam ka Forum ula ong, “Ka jingdawa jong ka Forum ka long ban kyntiew kyrdan ïa ka Civil Sub Division kaba kynthup ïa artylli ki C&RD Block- Ka Shella-Bhalaganj bad ka Khadarshnong-Laitkroh C&RD Block. Ka Pynursla ka dang shu ïoh thymmai ïa ka Civil Sub Division bad kam don jingïadei eiei ruh em bad ka jingdawa jong ka Sohra”.