Press "Enter" to skip to content

Ïaid shakhmat ka ai injek Ñiangpyrsit ha WJH palat 59 hajar ïoh injek

Jowai, Risaw 06: Ka jingai injek Ñiangpyrsit bad Ñiangpyrsit German ne ka Measles Rubella Vaccination Campaign (MRVC) kala ïaid shait shait ha West Jaiñtia Hills District bad kam don kino kino ki jingjia.
Katkum ka kaiphod haduh 4 tarik une u bnai ka tnad ka Koit ka Khiah ka District kala lah pynïoh injek haduh 59772 ngut ki khynnah na ki 742 tylli ki skul. 152 tylli ki skul kila ïoh injek 95 haduh 100 percent ïa baroh ki khynnah kiba dei ban ïoh injek.
Ka Bor Synshar District jong ka West Jaiñtia Hills District kala ai khublei ïaki kmie ki kpa, ki nonghikai, ki nongïalam niam bad ki nongïalam shnong bad ki shnong kiba la kyrshan ïa kane ka jingthmu jong ka sorkar ban ïakhun ban pynduh jait ï’u Ñiangpyrsit.
La kyntu shuh shuh ïa baroh ki paidbah ba nang ïai bteng ban ai ka jingïatreilang naka bynta ban ai jingïada ïaki khun ki kti na une u jingpang. La ïathuh ba une u Ñiangpyrsit bad Ñiangpyrsit Germen ula sar teng ha ki katto katne ki shnong haka Jylla bad lada don ki khynnah kiba ym pat ïoh ïa kane ka injek ban ïada ïalam ïaki haka jaka sumar ba jan tam.