Press "Enter" to skip to content

Kwah ka Parliamentary Sub Committee ban kren bad thoh Hindi ha baroh ka ri

Shillong, Risaw 6 : Ka Parliamentary Sub Committee na ka bynta ka ktien thoh ktien tar ka la pynpaw ïa ka jingdonkam ban pynreikam noh da ka ktien Hindi ha baroh kawei ka ri na ka bynta ban kren bad ban thoh ban tar ha ki skul bad ophis sorkar.
U Chairman jong kane ka Sub Committee u Chintamani Malvya ha kaba pynpaw ïa ka jingdonkam ban nang pynkhlaiñ ïa ka jingpyndonkam ïa ka ktien Hindi ha kane ka thaiñ shatei lam mihngi ka ri India u la ong ba ka sorkar pdeng ka kwah ba kumno kumno ruh dei ban poi 55 % ka jingpyndonkam ïa ka ktien Hindi ha kane ka thaiñ shatei lam mihngi ka ri India.
“ Kane ka thaiñ ha ka hap ha ka kyrdan “C” bad kumta ka jingpyndonkam ïa ka ktien Hindi ka dei ban poi 55 % ha ki ophis sorkar namar ha ki kyrdan A bad B la pyndonkam 100 % ia ka ktien Hindi” ong u Malvya.
Ha kane ka jingwan sha Shillong kane ka Sub Committee ka la leit jurip ïa ki ophis sorkar pdeng ban lap kumno ki pyndonkam ïa ka ktien Hindi bad ha kane ka jingleit jngoh ki la leit sha ka ophis Custom bad SBI ban lap haduh katno la pyndonkam da ka ktien Hindi.
War la katta ruh u la ong ba ka sorkar ka pynshlur ba ki ktien tynrai ruh ki dei ban kiew bad dei ban pynmih ia ki jingthoh jingtar bad ki kot ha ka ktien tynrai hynrei ka Hindi ka dei beit ban treikam lang ha kane ka thaiñ kumba treikam sha kiwei ki bynta ka ri India.
“ Ngi kwah ba ka ktien tynrai ruh kan kiew bad kam don kano kano ka jingsngew pyrshah lada kiew ka ktien tynrai hynrei ka Hindi ruh ka dei ban ïa kiew lang. Lada ki briew na kane ka thaiñ ki leit sha kiwei ki bynta ka ri India bad lada kim nang kren ne thoh da ka hindi kin shem jingeh bha ha ki eksamin ne kino kino ki kam” ong biang u Mavya.
Katba ka sorkar pdeng ka dang kwah ban pyndonkam da ka ktien Hindi hynrei lah ban pynkynmaw ba ka jingkren jong Lat ba rim hapoh Assembly da ka Hindi ka la wanrah ka jingpyrshah jur na kiba bun ki MLA.