Press "Enter" to skip to content

Pdiang u Bah Lapang ban long Kñi Rangbah ka Sorkar MDA kum u Chief Adviser

Shillong, Risaw 05: U Nongïalam barim ka Congress Bah D.D.Lapang hynne ka sngi ula pynbna ïa ka rai ban long kum u ‘Kñi Rangbah’ jong ka Sorkar Meghalaya Democratic Alliance (MDA) ba lamkhmat da ka National Peoples Party (NPP), kaba la wanjia ruh shisngi hadien ka jingshah thung kum u Nongaibuit ba hakhlieh duh
(Chief Adviser) ka Sorkar.
“Hadien ka jingpyrkhat kaba sani bha bad hadien ka jingïasyllok bad ki paralok, ki bahaïing hasem nga la rai ban pdiang ïa ka jingtyrwa ban long u Nongaibuit ba hakhlieh duh ka Sorkar Jylla” ong u Bah Lapang haba ïakren bad ki lad pathai khubor hynne ka sngi thohdieng.
U Bah Lapang uba la long Myntri Rangbah ka Jylla haduh san sien, ula shah thung kum u Nongaibuit ba hakhlieh duh hadien ka jingiehnohkam jong u kum u Dkhot ka Congress namar ka jingpyrshah ïa ka polici jong ka All India Congress Committee ban weng noh ïa baroh ki Nongïalam bala rangbah ka rta. Lah ban kdew ba u Bah Lapang u dei ruh uba la bat teng kum u Nongaibuit ba hakhlieh jong ka Sorkar Meghalaya United Alliance-II (MUA-II) ba lamkhmat da ka Congress.
Kat kum ka jingong u Bah Lapang, haba ka jingtyrwa kala wan na ka liang ka Sorkar Jylla, ki nongtyrwa ki khlem pynpaw eiei ruh em haba ïadei bad ka jingpynïasoh sha kano kano ka seng saiñ pyrthei.
“Kai (MDA) kila pynpaw ba ki khlem wan ïakynduh ïa u ban khot pynïasoh sha kano kano ka party hynrei ki shu kwah ban pynsngew ba ki kwah eh ïa u ban long u ‘Kñi Rangbah’ bad ba un long u nongbtin lynti ïa ki bad ïa ka Sorkar Jylla. Nga la pynpaw ha ki ba nga kwah ban long laitluid ha kaban ai ka jingshakri ym ban shah teh kyndon” ong u Bah Lapang.
U Bah Lapang u ong ba dei hadien katto katne sngi ba ula ïoh pdiang ïa ka jingpynbna (Notification) ba kila thung ïa u kum u Nongaibuit ba hakhlieh duh jong ka Sorkar Meghalaya.
Une u Nongïalam saiñ pyrthei bala rangbah bha ka rta, ula ong ba haduh mynta um pat ïakynduh satia ïa u Myntri Rangbah ka Jylla Conrad Kongkal Sangma ne ïa u Symbud Myntri Rangbah Bah Prestone Tynsong namar kine baroh arngut ki don shabar ka Nongbah Shillong hynrei baroh arngut kila ïakren bad u lyngba ka phone.
“Nga ai khublei ïa ka Sorkar MDA ba ka pynkit ïa kane ka lyngkor ha nga bad nga kular ba ngan ai ka jingiatreilang bad kane ka Sorkar” ula ong haba bynrap “Nga la don hangne ban peit ba ngan ai ka jingshakri bad ngan shakri katba nga dang im”.
Haba pynpaw ba ka jingthungkam ïa u kam mut ba ula pynïasoh sha kano kano ka seng saiñ pyrthei, u Bah Lapang ula ong “Ngan iatreilang bad kano kano ka kynhun kaba ailad ïa nga ban shakri kham bha ïa ki paidbah. Dei ha kane ka nongrim ba nga la pdiang ïa ka jingtyrwa, kaba dei ruh ka rai jong baroh kiba don ha ka Sorkar Jylla”.
Ka Sorkar MDA ka dei ka sorkar synrop jong ki hynriew tylli ki seng saiñ pyrthei ba kynthup ïa ka United Democratic Party (UDP), Bharatiya Janata Party (BJP), People’s Democratic Front (PDF), Hill State People’s Democratic Party (HSPDP), bad ka Nationlist Congress Party (NCP).
Hab akylli la u don jingthmu ban pynïasoh ïalade sha kano kano ka seng saiñ pyrthei kiba don ha ka Sorkar Jylla, une u Myntri Rangbah barim ka Jylla ula ong “Nga khlem pat lum thup ïa ka kyrteng bad nga la bat ïa u let ban pruid dak bad kan dang shimpor ïa nga ban leh ïa kane”.
Une u Nongïalam saiñ pyrthei ula kyntait ruh ïa ki khubor ba u don jingthmu ban pynkha ïa ka seng saiñ pyrthei ba thymmai hapoh ka Jylla. Ul aong “Ban pynkha ïa ka seng saiñ pyrthei ba thymmai bad une u ñiuhlieh jong nga, ka dei tang ha ka jingphoh sniew” ong u Bah Lapang.