Press "Enter" to skip to content

Pyni nam ki shipai Suiñ ïa ki Liengsuiñ Thma ha ka lyngkhuh 86 snem

Shillong, Risaw, 06: Ki shipai Suiñ jong ka Indian Air Force, Eastern Air Command, mynta ka sngi ki la pyinam sha ki paidbah nongshong shnong ka Nongbah Shillong ïa ki liengsuiñ thma ha ka jingrakhe ïa ka jingïaid lyngba kaba 86 snem jong ka Indian Air Force (IAF).
Da ki spah ngut ki paidbah ki la kiew sha ka ktem sah jong ki shipai Suiñ ban leit sakhi ïa ka jingpyninam jong ki shipai ïa ki Liengsuiñ ïaleh thma ïa kaba la tip kum ka ‘Air Force Fest Festival 2018 bad kumjuh ïa ki Helicopter ba la pynieng ha ki jaka ba la shna kyrpang.
Kane jingpyni nam ïa ki liengsuiñ ïaleh thma ba la pynlong ha Shillong Advanced Landing Ground (ALG) kaba la sdang mynta ka sngi saitjaiñ la plie paidbah da u Air Officer Commanding-in-Chief, Eastern Air Command, u Air Marshal R Nambiar AVSM VM & Bar. Kane ka tamasa kan sa kut noh lashai ka sngi u Blei.
La pynsdang ïa kane ka Air Fest 2018 da ka jingpynher ïa ki Mi-17 Helicopters bad ki liengsuiñ thma Su-30 MKI.
Ki paidbah ha kane ka sngi ki la ïohlad ban sakhi ïa ki sap ïakhun thma jong ka kynhun shipai suiñ ba la kum kum ka ‘Garud’, kiba dei ki Commando jong ka Indian Air Force. Nalorkata, la pyninam ruh ïa ki paidbah ïa ki tiar thma jong ki shipai bad la pynbyrngia ïa ki paidbah da ka kynhun put jong kane ka tnat shipai suiñ bad kiwei kiwei.
Ka IAF ka la shna ruh bun tylli ki jaka ai jingtip sha ki paidbah, ïa ki jingbuh jingkynmaw ïa ki jingjia ha ka jingshakri jogn kane ka kynhun shipai suiñ ban ïada ïa ka ri India bad kiwei kiwei.
Kane ka tamasa ka la pynskuiñ bad pynshongshit haduh katta katta ïa ki khynnah skul kiba wan sakhi ïa kane ka sngi bad kiba la ïoh bun ki lad jingtip kiei ki jingdonkam ha ka kyrdan pule ban pynïasoh ïalade sha ka kynhun shipai suiñ.