Press "Enter" to skip to content

Pyntrei noh ïa ka surok Langja-Mawthawkrah

Nongstoiñ, Risaw 8: La kumba shi snem ei ei naduh ba ka sorkar ka la ai jingtrei ïa uwei u Kontraktor ba un pynbha bad siangrong ïa ka surok na Langja haduh Mawthawkrah kaba jngai kumba 8 kilomitar, hynrei haduh mynta um pat leh ei ei satia.
Kane ka surok la dep pyntrei naduh ki snem ba mynshuwa ïa kaba la bei pisa da ka sorkar pdeng lyngba ka skhim Pradhan Mantri Gramsadak Yojana (PMGSY). Pynban na ka liang u Kontraktor u ba la ïoh ban pyntrei ha ka ban pynbha bad siang rong haduh mynta um pat leh ei ei. Halor kane, na ka liang ki nongïalam ka Synjuk ki Nongsynshar Shnong Jyrngam Sirdarship ba kynthup ïa u Bah K.Mawlieh President, Bah B.Nonglang Secretary bad kiwei kiwei ki riew rangbah ka Hima Jyrngam, ki la pynpaw ïa ka jingsngew lyngngoh halor katei ka jingpynslem jong utei u Kontraktor. Ha kajuh ka por kitei ki nongïalam ka synjuk ki la ïathuh ruh ba ha ka taïew ba la dep ki la leit ban ïakynduh ïa u Superintendent Engineer jong ka tnad PWD ban kyntu ïa u ba un bthah ïa utei u Kontraktor ba un pyntrei noh mar dor ïa katei ka surok.
Kitei ki nongïalam ka synjuk ki la ong ruh ba naduh u bnai Naiwieng jong u snem ba la dep, ka sorkar ka la dep die ïa ki tender na ka bynta ban pynbha bad siang rong ïa katei ka surok. Na ka liang ki paidbah katei ka thaiñ ki la ap kyrmen ban sa iohi noh sa ki kam, hynrei na ka daw jong ka jing buhteng jong utei u Kontraktor ka jingkhmih lynti ka shu kut noh. Ki la ong ba imat utei u Kontraktor um pat kot bor ban pynlut ha katei ka jingtrei kaba heh, lym kumta u la dei ban sdang wat lada um lah ban pyndep ruh.
Ka jingbuh teng ka la pynlong ïa ki paidbah ba kin ïakynduh jingeh ha ka leit ka wan khamtam eh ha ka por lyiur, namar katei ka surok ka la sniew shaba palat ha kaba wat ki trok ruh ki la shem shitom haduh katta katta ban ïaid. Kito kiba thmu ban leit phah sumar ha Nonglang PHC, la hap ban kit ïa ki da ki Mahindra Pickup. Kaba kham I sangsot ka dei ïa ki longkmie ba armet kiba hap ban leit phah check up man la ka taïew ha Nonglang PHC. Kumta halor kitei ki jingeh na ka liang kitei ki nongïalam ka synjuk ki la dawa ïa u Kontraktor ba un pyntrei noh mardor bad u dei ban pyndep shuwa ban wan ka lyiur. Ki la dawa ruh ba u dei ban pyntrei beit thik kat ki kyndon ba la bthah da ka sorkar, namar lada um trei kat kum ki kyndon ba la bthah da ka sorkar na ka liang ki nongïalam ka synjuk kim banse ban ujor sha ki bor ba halor.