Press "Enter" to skip to content

Ujor u MDC sha u Myntri bym lah ai jingshakri ka Civil Hospital Ialong

Jowai, Risaw 08: Namar jingdkoh ka jingai jingshakri ka Jowai Civil Hospital, Ialong kaba bunsien ka phah ïaki nongpang ban leit ai jingsumar sha kiwei pat ki jaka sumar ha Jowai bad sa Sor Shillong, kala pynlong ïa u MDC JHADC Marki Mulieh ban ujor sha u Myntri ka Koit ka Khiah ban tuklar ban pynbiang ïaki jingdawa jong kane ka aspatal sorkar.
Une U MDC ka Jowai North ula ai da ka dorkhat ha U Myntri ka Koit ka Khiah jong ka Jylla Bah AL Hek haka 5 tarik une u bnai.
Katkum ka dorkat ula ong ba bun ki paidbah kila ud kila nam sha u halor ka jingdkoh ka rukom treikam ka Civil Hospital kaba don ha Ialong ban ai jingsumar ïa u paidbah bad kaba pynlyngngoh ruh ba ki doctor bunsien ki phah ïaki paidbah kiba thmu ban shah sumar ha katei ka hospital la phah (refer) noh ïaki shawei pat.
Une u MDC ula leit jurip ïa kane ka hospital bad ula kynnoh ba kane ka aspatal kam don doctor -Medical Officer bad ki doctor specialist bad kim lah ban ai jingsumar ba pura ïa u paid nongpang kiba wan na kylleng ka Jaiñtia Hills.
Ula ong ba ka Jowai Civil Hospital kaba don 100 jingthiah ka don tang 2 ngut Doctor Medical Officer bad 17 ngut ki Doktor Specialist bad kane ka jingduna nongtrei ka hospital ka dei ka bym lah ban pdiang bad ula kynnoh ba ka Koit ka Khiah kala pynkheiñ ruh ïaka kyndon aiñ Medical council of India.
Ula kynnoh ruh baka tnad ka Koit ka Khiah imat kam shym la shimkhia ban peit ïaki jingdonkam katei ka jaka ban pynbiang ne ban thung doctor hadien ka jingkiew kyrdan, ka jingiehnoh kam bad shah pynkynriah kam ki doctor.
Ha kaba ïadei bad ka kam puid kam sumar briew (Surgery Department) hadien ka jingiehnohkam u Dr. Syiemlieh haduh mynta kane ka kam ka thylli. Ka Gynnaelogist ruh ka jia kumjuh hadien ka jingpynkriah kam ïaka Dr. L Challam kane ka post ruh ka thylli. Haka tnad Anesthesia bad Ultra Sound ym don doctor bad ka anesthesia don tang uwei.
Thud ka Bording:Ha kawei pat ka khubor Une u juh u MDC ula ujor sha u Deputy Commissioner, West Jaiñtia Hills District halor ka jingthud ka bording kaba la ktah ïa baroh ïa u paidbah ba pyndonkam bording. Ula ong baka thaiñ Ladthadlaboh, Mihmyntdu, Sabahmuswang bad Pasyih kila shah ktah bha na kane ka jingpynlip bording ka MePDCL. “Nga ruh nga kynduh ka juh ka jingeh ban treikam da ka computer bad laptop namar kane ka jinglip ba khah khah ka bording”, la ong u MDC Marki Mulieh bad ula ong katno tam ïaki khynnah skul kiba pynkhreh ïaki eksamin ha ki kyrdan bapher bapher kila kynduh jingeh bha na kane ka jinglip light.
Ula ong ruh baka jingpynlip light ka MePDCL kalong kaba bym donpor bad kam shym la pynbna paidbah bad kala pynlip bording katkum ka jingsngew donkam ka tnad bad ka daw ka tip khambha ka tnad MePDCL. U ne u MDC ula ong ba kane ka jingeh ka dei kaba la ïakynduh da baroh ki nongpyndonkam light ba shong basah ha Rilum Jaiñtia.
Une u MDC ula pynpaw ka jingpyrshah bad pynrem ïaka rukom treikam ka MePDCL bad kyrpad ïa u DC ka WJH ban tuklar halor kane ka jingpynlip light ba khah khah ka tnad bording.