Press "Enter" to skip to content

Dang shimpor ban pyntreikam ïa ka MHIS 4, ba am dor palat ki Kompeni

30% ladep injek ñiangpyrsit/rubella
Shillong: Ki paidbah kiba la mad ïa ki jingeh namar ka jingkut noh ka por treikam jong ka MHIS 3, ki dang hap ban shah biang ïa ki jingeh, namar ba ka jingpyntreikam ïa ka MHIS 4 kan dang shim por sa kumba ar bnai tam eiei. Ka daw ka long ba ka sorkar jylla kam pat ïoh ïa ka kompeni kaban shimti ban pyntreikam ïa kane ka insurance scheme na ka bynta kiba pang ba shitom ha ka jylla.
Kawei pat ka daw ka long bay m pat lah ban weng ïa ki jingeh ha kaba pynïasohlang bad ka skhim na ka sorkar pdeng ba la tip kum ka Ayushman Bharat ba la pynmih da ka sorkar u Narendra Modi ha kine ki bnai baladep.
U Myntri ka tnad ka koit ka khiah, u Bah AL Hek, habaïakren bad ki nongthoh khubor ha ka sngi baa r, u la ïathuh ba ki don phra tylli ki kompeni
kiba la thep tender ban pynïaid ïa kane ka skhim bad na kine ki phra tylli, la shem ba tang san tylli ki long kiba biang. Hynrei ka kompeni kaba thep ïa ka dor kaba rit tam ruh, ka poi haduh 1999 tyngka ka premium na ka bynta uwei u nongpang, kaba long ka dor kaba la palat arshah na ka dor jong ka premium ha ka MHIS 3 kaba long tang 911 tyngka.
“Ngin hap ban khot tender biang sa shisien bad kane ka dang kham shimpor bad la kumno kumno ngi lah ban pyntreikam noh ha ka taïew balai u Nohprah mynta ka snem”, la ong u Bah Hek.
U Myntri u la ïathuh ba ka MHIS 3 ka la kut noh naduh ka 30 traik u Jylliew 2018. Hadien la bteng biang sha ka 15 tarik u Nailar bad hadien pat sha ka 25 tarik u Nailur. U la pynshai ba ka skhim kan treikam tang ïa kito kiba la leit phah sumar hapoh ka 25 tarik u Nailur. Kiba leit hadien kane kam treikam shuh. Haba pynshai shuh shuh ïa kane, u Secretary ka tnad ka koit ka khiah, u Pravin Bakshi, u la ong ba katkum ka jingbthah ka sorkar pdeng la buh ba ka premium na ka bynta uwei u nongpang kan long kumba 1050 tyngka bad kane kaba la buh da kompeni ba tyrwa ïa ka dor kaba rit tam ka lah heh palat bad ym lah ban pdiang.
U Bakshi, u la ïathuh ruh ba ha ka MHIS 4 la khmih lynti ba kumba 7.40 lak ngut ki briew kin ïoh jingmyntoi, namar ba baroh kiba don ha ka longing kin ïoh jingmyntoi ym kum ka MHIS 3 kaba la ai tang ïa san ngut na kawei ka longing. Halor ka jingpynrung lang ïa ka skim jong ka sorkar pdeng, kiban ïoh jingmyntoi kin long kumba 3.14 lak ngut, bad kine kin dei na ki longïing baduk (BPL). Da kane ka jingpynïasoh lang bad ïa ka MHIS 4 bad ka Ayushman Bharat, ki paidbah kin ïoh jingïarap haduh 5 lak tyngka marwei.
Injek Ñiangpyrsit/Rubela: U Bah Hek, u la pyntip ruh ba ka jinginjek na ka bynta u ñiangpyrsit bad rubella, ka la nang ïaid shakhmat, ha kaba haduh mynta ladep ai injek kumba 30 percent ha baroh kawei ka jylla. Kine ki kynthup 1.88 lak ngut ki khynnah shynrang bad 1.93 lak ngut ki khynnah kynthei. Ka District kaba la ïaid bha shakhmat ha kane ka jinginjek, kadei ka East Jaiñtia Hills kaba la kynjoh sha ka 65 percent, kaba bud kadei ka West Jaiñtia Holls 60 percent bad kaba lai kadei ka West Khasi Hills 42 percent.
U Myntri sa shisien u khot ïa ka jingïatreilang jong baroh na ka bynta ka jingkoit jingkhiah jong ki khynnah kiba hapoh 15 snem. “Ngi la ïoh ïa ka jingïatreilang naduh ki skul, ki shnong bad kumjuh ruh ki paidbah halor kane ka bynta”, la ong u Myntri.