Press "Enter" to skip to content

Dawa ka KSU ïa u DC ban bthah ïa ki Puja Committee ban shna da ki pung bret blei thaw

Shillong, Risaw, 09: Ka Khasi Students’ Union (KSU) Jaiñtia Hills District Unit bad ka Lumshnong Unit ka la dawa na u Deputy Commissioner (DC) ka East Jaiñtia Hills District ba un bthah ïa ki Puja Committee ba ki dei ban thaw la ki jong ki pung pynngam blei thaw bad pyrshah jur ïa ka jingthmu ban ïai bret ïa ki blei thaw ha ka Wah Lukha kaba lah ban pynsniew ïa ki jingthung jingtep bad ki dohum dohwah.
“Ha manla kum kine ki jingnohblei, ki don ki jinghylla bad jingshoh Ksing kaba pynthud shikatdei eh ïa ki mrad bad ki sim ki doh ba don hapoh ka Narpuh Wildlife Sanctuary. Ka jingjakhlia kane ka wah ka ktah ïa ki shnong ba don ha shilynter ka wah bad ruh ïa ki nongkhwai dohkha,” ong Samla u Benison Kamar,
Vice President bad u samla Kwilnis Suchiang, Secretary ka Environment & Cultural Cell ha ryngkat ka jingïadon lang ki dkhot na ka KSU Lumshnong Unit.
“Ka KSU kam jingpyrshah ïa ka jingrakhe ne jinglehniam jongno jongno namar kano kano ka jaidbynriew ka donhok ban shakri ïa kano kano ka Niam katba ki sngewbit, hynrei ka jingrakhe ne jinglehniam kam dei pat ban wanrah da kaba pynjaboh ïa ki tyllong um ne ki wah ki duid. Ka Wah Lukha ka dei ka Wah kyntang u barim ba jah, ka dei ka nongkynti (Public Asset) jong kito ki thaiñ ïa kaba ym lah ban kam trai da kano kano ka niam ne riew shimet,” ong kine ki nongïalam ka Seng.
Ka seng ka la ai jingmut ïa u DC ban bthah ïa ki Puja Committee ban shna kyrpang ïa ka jaka pyngam blei thaw (Dumping Area) na ka bynta ka jinglehniam Puja kum sha kiwei kiwei ki jaka khnang ba kan ym ktah ïa ka mariang ne ki wah.
‘Lada sha kiwei ki jylla Ri-thor, ki dang shna da ka pung ban pynngam blei ha ka jingïalehniam jong ki, balei ym lah hangne? Ngi sngew burom ïa ka mariang bad ki lum ki wah bad ngim kwah ban ïohi ba ka Wah Lukha kan kylla kum ka wah Wmkhrah ne Umshyrpi ba don ha shillong. Ngi sngewlyngngoh kumno u DC ka East Jaiñtia Hills u ai jingbit ba kin bret blei thaw hangto khamtam haba ka don ka jingktah ïa ki um ki wah. Ngi pyrshah ïa kino kino ki rukom kiba buh ïa ka wah ka jingma. Ngi kyrmen ba lyngba kane ka jingïakynduh, u DC un sa pyntip ïa ki Puja Committee ba kin shna da ki pung ban bret blei thaw kumba la sdang ban leh sha kiwei ki jaka’, la ong u Samla Ma K Suchiang .
Lah ban pynkynmaw hangne, na ka liang ka Hynriew Shnong Lukha Association (HSLA) ka la jingthmu ban ïaid shaphrang ban wanrah biang ka jingkhuid jingitynnad jong ka Wah Lukha bad kumjuh ka Sonapyrdi Tourism & Economic Development Society (STEDS) ka don jingthmu ban pynlong ïa ka Wah Lukha kum ka jaka jngoh kai pyrthei (Tourist Sports) ban wanrah ki lad kamai jakpoh na ka jinghiran ka kyrduh kam.
“Lada ailad ïano ïano ban leh katba mon ka ktah ruh ïa ka Narpuh Wildlife Sanctuary kaba don mar syndah bad katei ka jaka ba ju pyndonkam ha kaba lehniam Puja,” u la ong.
Na ka liang u DC u la pyntip ba u la lum ïa ka jingïalang bad ki Waheh Shnong jong kito ki thaiñ lem bad ki Puja Committee halor kane ka kam. U la ong ba ki Waheh Shnong kim shym la pynpaw ka jingpyrshah ne ujor eiei halor katei ka kam.
“La ka long kumta ruh, ka KSU ka ïai dawa ba u DC un kitkhlieh ban ai jingtip ïa ki Puja Committee ba kin sngewkhia ïa ka jingjakhlia ka wah lyngba ka jingbret blei thaw,” la ong shuh shuh ka KSU.
U DC u la pyntip sha ka Seng ba un sa pyntip sha ka tnat Meghalaya State Pollution Board (MSPB) ban tohkit bad ban bishar. Hynrei na ka liang ka Seng ka kyntu ïa u DC ban shimkhia ïa katei ka kam khnang ban lah ban pynneh ïa ka jingitynnad ka Wah Lukha khamtam haba ha Wah Myntdu, dang khyndiat snem, ki la khang ïa ka jingbret blei thaw.
Ka Seng ka la ujor ruh ha u DC halor ka jingbym lah ka National Highway Authority of India (NHAI) ban shna ïa ki lynti ïaid kjat (footpath) ha baroh ar liang ka surok, namar ka jingbymdon ki lynti ïaid kjat ka wanrah ka jingma bakhraw ïa kiba ïaid ba ïeng khamtam hapoh shnong pohthaw, sha ki thaiñ Narpuh ym pat don lynti ïaid kjat tang kawei ruh.
Ha ka jingïadei pat ka Toll Gate ka ban sa plie shen ha Lumshnong, ka seng ka la pan jingpynshai na u DC ha ka jingïadei bad ka jingkhrong khajna ïa kito ki kali shimet ne ïa ki kali kamai kiba don sha kito ki thaiñ. Ïa kitei ki ar bynta ka jingbympat don ki lynti ïaid kjat bad ka jingsiew khajna ha Toll Gate, utei u khlieh nongsyshar ka District u la ong ba ïa katei ka kam hap ban ai jingthoh sha ka NHAI.