Press "Enter" to skip to content

Kyrpang ka ïew Langstieh bym ailad ka Dorbar Shnong ïa ki nongkhaii bar jylla

Shillong, Risaw, 09: Ka shnong Mairang, ha ka jingkynjang kumba 1564 metres na sla duriaw, ka jngai tang kumba 40 kilometer eiei na sorbah Shillong, ha ka lynti National Highway 44E ban leit sha Nongstoiñ-Tura. Ka dei ka Civil Sub-Division jong ka West Khasi Hills District kaba hap hapoh ka Hima Nongkhlaw. Ki don shibun kiei kiei kiba itynnad bad sah nam ha kane ka shnong kiba khring ïa ki paidbah nongthied nongpet. Kawei na kita, ka long ka Ïew Langstieh, kaba don ha shnong Pyndengumïong, Mairang bad ki briew na kylleng kane ka thaiñ ki poi lut ban pynlong ïa ka khaïi ka pateng, ka ïadie ïapet bad kamai jakpoh. Ka sngi ïew ka hap ha ka sngi Umni, kaba ïatyngkhuh lang bad ka ïew Umdohlun sha ri-um Sepngi, ka ïew Umsning  sha Them Ri Bhoi, ka ïew Muktapur sha Ri Lum Pnar bad kumta ter ter kumba ju long naduh ki por kulong kumah.
Manla ka sngi ïew ka ïathied ïapet ka thnem bha hangne bad ki nong ïew, kynthup ïa ki longkmie longkpa bad ki samla samhoi ki wan kylleng ki shnong naduh na Mawshut, Mawnai, Mawwkohmit, Mawkynsah, Wahra, Mawkhap, Bynther, Langtor, Mawmaram, Mawpun, kumta ter ter. Tangba, kawei kaba kham pher na kiba bun ki ïew Khasi tynrai, ka long ba hangne, ym don uwei ruh u dkhar ne ki briew na Ri-thor u ban khaïi namarba la khang pyrshah da ki bor badei peit bad pynïaid ïa ka, ha ryngkat ka jingkyrshan da ka Dorbar jong ka Hima Nongkhlaw.
La lap ba ki Basa hapoh kane ka ïew ki dap beit da ki nongdie trai shnong trai muluk wat haduh ki nongdie jingdie khutia mutia kiba shu shong die jingdie harud ki basa. La lap ruh naduh ki nongdie ice-cream, ki nongsuh juti, ki nongdie muri bad kiwei kiwei ki jait kam ba ju trei da ki bar jylla ha ki snem ba ladep la knieh lut da ki Khasi kiba bylla jakpoh na kane ka kam.
Katkum ka jingïathuh jong u Bah Bornart Syiemiong, u Sordar ka shnong Pyndengumiong, u la ong, “naduh ka por jong ki longshuwa ki manshuwa kim ju shah ïa ki bar jylla ban wan khaii lait noh tang ïa u nong khaïi Masi, ki khar Bhut ki ju wan ban die dawai kum ki doktor jakoid bad mynta ki la jah hi namar ba lah don ki doktor na kane ka thaiñ kiba ladep ïa ka jingpule Doktor.”
U ïathuh ïa kito kiba wan ban trei ïa ka kam kaba ki Khasi kim lah, ki donkam ban da ïoh ïa ka jingbit na ki bor pynïaid shnong kata ruh bad ka jingïateh por, hadien ba ladep ka kam, ki hap ban leit phai noh.
Ka shnong Mairang, ka la teh ïa kine ki kyndon namar la ong ba lada wan tyllep u bar jylla ki trai shnong trrai muluk kin duh kam duh jam, kin duh ka bylla ka sngi, ka khaïi ka pateng. Ho-oid, lada aikam ïa u dkhar ne u bar jylla kan kham kiew kham roi, hynrei ki trai ri trai muluk lajong kin duhlad, kumta la pynjari ïa ka kyndon treikam jong ka Shnong ban adong tyngeh.
“Ki don ki briew jong ngi kiba jaituh hynrei ngi hap ban pynshlur ban minot ha ka kam, peit kum ha ka kam siang rong, mynta ki lah don ki Khasi kiba lah nang ban trei ïa kane ka kam. Ngi thmu ban ai ki kynja jinghikai (training) kum ha ka thaiñ jaiñ, swetar, ban lait na ki kam Sorkar, ki don bun ki kam watla ka rep ruh ka la hiar hynrei bun kiba dang im na ka rep bad ki la nang ban rep kiwei de ki jait jingthung, ki lah ban leh lada ki pyrshang bad trei shitom,” ong u Sordar ka Shnong Pyndengumïong.
Hangne, ki nongshong ïew ki long trai tang ïa ki Basa kiba ki shong bad die jingdie. Ka jaka ka khyndew ka dei ka jong ka Hima hapoh ka jingpynïaid jong u Syiem. La ïohi ruh ba ki dukan hangne kim long ryntih haba peit ïa ki mar ki mata kiba la die bad kane ka ïew ka long kaba khapngiah haduh katta katta namar ka jingïatuid jong ki nongthied nongpet. Hynrei, ka long pat ka jingdonbok shisha ban tip ba shen kan sa wan ka jingkylla dur bak-ly-bak ha kane ka ïew namar lyngba ka jingïarap na ka skhim pynroi jong ka Sorkar Pdeng yn tei noh da ka ïng mala, ïa kaba yn pyntrei ha ki lai bynta, lane 3 Phase.
U Bah Brailin Lyngdoh Nongbri, Myntri uba peit ïa ka ka Hima Nongkhlaw u la ong, “ka jingkhuid ruh kan long kum ka jaka die jhur kaba pynmih shibun ki jhur ba la kyntait. U don u Chowkidar, nong sar ïa ka ïew. Ka Shnong Pyndemumiong ka peit ïa ka Ïew bad ka don la ka jong ka jaka theh ñiut. Ka shnong ka la thied jaka shuh shuh kaba kham heh ban theh ñiut bad ïa ka jaka bret ïa ki synrum yn sa tei ynda la ladep ka Phase I, kan bteng ka Phase II bad Phase III, bad ka rukom siew kan long tang ka bai musur.”
“Ha kaba ïadei bad ka jingdheng kali, ngi lah don ka jingpyrkhat (plan) ha kaba ka mala kaba shapoh eh jong ka ïew, (Ground Floor) kan long ka jaka set kali, ym lah ban pynkynriah ïa ka ïew, namar ka long ka jaka pdeng ïa baroh. Ngi kyrmen ba ynda la dep ka Phase 2.6 akar kan ïarap ban pyllait ïa ka dheng kali. Ka jaka ba khring ïa ki nongjngoh kai pyrthei. Kumno ban kyntiew ïa ka jngohkai pyrthei ngi thmu ban kham pynitynnad bad ngi ngeit ba ynda la dep ka jingtei hangne kan don ka View Point bad sha lyndet kane ka shnong ban shna ki View Point bad ka Park bad sha Khri ban wanrah ki skhim pynroi ha ki jaka jong ka Hima, lyngba ki Home Stay, Krem Tirot, ka jingkhring ïa ki nongjngohkai kan aikam ïa ki briew jong ngi,” la bynrap shuh shuh u Myntri ka Hima Nongkhlaw.
Ho-oid, lada ailad ïa ki bar jylla ban khaïi hangne, khlempep ka die ka thied kan kiew stet kumba long ha kiwei ki bynta jong ka Ri Khasi bad Jaiñtia, hynrei ka jingpynjari jong ka Dorbar Hima Nongkhlaw da ka Adong hangne, kan long ka nuksa ïa kiwei pat da kaba plie lad plie lynti ïa ki para doh para snam ban pyrshang ban ïeng ha la ki jong ki kjat ban kamai jakpoh watla ki la sdang tang na i kam iba rit eh bad ka ïew kan thnem haba ïakyrshan lang iwei ïa iwei pat.