Press "Enter" to skip to content

Pynkylla pung ri dohkha u Ma Welcom ïa ki krem tih dewiong Khliehriat West

Khliehriat Risaw, 09: Ka nongmuna ba kynsai tam ha East Jaiñtia Hills District ka long, ha kaba uwei u riew rangbah u ba la tip kyrteng kum u Ma Welcome Dkhar, na ka shnong Khliehriat West u la lah ban pynwandur kum ki pung ri dohkha ïa kiba u la pynlut pynsep na lade shimet kumba T.1 klur tam. La ong ba mynnor kitei ki pung ri dohkha ki dei tang ki  thliew tih dewiong.
U Ma Welcome ha kaba ïakren bad u Mawphor ha Khliehriat,u la ïathuh ba u dei u briew uba ju sngewtynnad bha ban khwai dohkha kumta u la shna da ki pung dohkha kum kawei pat ka lad ban kamai jakpoh.
“Ha shuwa ba ngan ri dohkha, nga la ber da ka shun, ka dawai Urea bad u Bleaching Powder ïa ki krem bad ki thliew ba ladep tih dewiong, hadien kata nga pyrshang ban ri ki dohkha, nga ïohi ba ki im ki heh ki san kumta nga la nang pynheh shuh shuh ïa kine ki lai tylli ki pung,” ong u Ma Welcome bad ïathuh ruh ba ïa ki symbai dohkha la wanrah na sor Guwahati, ha kaba dang ha kine ki taiew ba ladep la wanrah haduh ar kwintal ne ar trok ki symbai dohkha ba la theh ha kine ki lai tylli ki pung.
U la ïathuh ruh ba u ju bsa jingbam da ka Chapot, ka eit masi bad u la ri haduh hynriew tylli ki jait ki jait dohkha ha kine ki lai tylli ki pung..
U MaWelcome u la pynpaw ba um shem jingeh eiei ha kaba pynïaid iew ïa ki dohkha, namar ha ka por ba u tong ïa ki dohkha na pung, ki paidbah nongthied nongpeit ki la dawa lypa bad ki la ap lypa ha phyllaw iing jong u.
U Bah Hubert Kharbuki, Superintendent of Fisheries ka Khliehriat, ha ka jingleit jurip ba dang shen u la ai ka jingïaroh ïa u Ma Welcome Dkhar halor ka jinglah jong u ban pynwandur itynnad ïa ki pung ri dohkha haba peit la i pynban kum ka jaka shongkai pyngngad watla ka don hapdeng jong ka sor ruh.
“Ka long kaei kaei kaba sngewtynnad ban tip ba wat hapdeng ka nongbah une u rangbah u dang lah ban pynwandur haduh katne ïa ka jaka ri dohkha jong u, ha kaba lada i donlad, la i dei pynban ban pynlong noh kum ka jaka shongkai pyngngad ne ka Aqua Park hapoh nongbah Khliehriat,” la kren ai mynsiem u Bah Hubert.
Utei u heh ophisar ka tnat Fisheries u la kular ba un ïai buddien ïa kane haduh ban da lah ban pynlong kawei na ki jaka bapawkhmat ha Khliehriat.
U la ai ka jingïaroh ïa ka rukom pynwandur ïa ki jingkieng, ki kynroh sawdong bad ong, “ngam ju poi pyrkhat ba kum kane ka don ha Khliehriat kaba dei ka jaka pdeng jong ka nongbah ka East Jaiñtia Hills District.”
Kawei kaba phalang jingmut hangne, ka long ba u Ma Welcome u khlem pynlehnohei ïa ki thliew bad ki krem ba ladep tih dewiong hynrei u la pynkylla bad pynwandur pat ïa ki sha ki jaka ri dohkha.
“To ai ba kane kan long ka nuksa bad ka nongmuna ïa kiwei ruh ba kim dei ban pynsepei kai ïa ki thliew bad ki krem tih dewiong kiba la dep pyndonkam hynrei ban bud ïa ka nuksa jong u Ma Welcome khnang ban saiñdur ban kyntiew ïa ka khaiï pateng hapoh ka District da kaba ri ïa ki dohkha bad kane ka dei ka jaitkam kaba neh pateng la pateng,” u la ong.
Na ka liang u Ma Welcome ruh u la kyntu ïa ki paitbah ba kin shimkhia ha ka kam ri dohkha ruh khang ban lah ban kyntiew wat ïa ka iew dohkha ha kane ka District khlem da donkam shuh ban da wanrah ki dohkha na shabar ka jylla.